আগন্তুক ১০ বছৰৰ ভিতৰত AIয়ে সকলোকে ধ্বংস কৰিব !

নিউজ ডেস্ক : এজন প্ৰাক্তন গুগল ইঞ্জিনিয়াৰে দাবী কৰিছে যে কৃত্ৰিম বুদ্ধিমত্তাই (AI) সম্ভৱতঃ আগন্তুক ১০ বছৰৰ ভিতৰত সকলোকে ধ্বংস কৰিব, যাৰ ফলত কোনেও অৱসৰৰ বয়সত উপনীত হ'বলৈ নাপাব। শেহতীয়া এক সাক্ষাৎকাৰত, নেট ছোৱাৰেছে বৰ্তমান চলি থকা এআই (AI) প্ৰতিযোগিতাখনৰ ওপৰত এক হতাশাজনক দৃষ্টিভংগী দাঙি ধৰে । য'ত বিশ্বৰ ডাঙৰ ডাঙৰ কৰ্পোৰেচনসমূহে নিজৰ আধিপত্য বিস্তাৰৰ বাবে বিলিয়ন বিলিয়ন ডলাৰ খৰচ কৰিছে।

ছোৱাৰেছে ২০১৪ চনত গুগল এৰি MIRI-ত যোগদান কৰিছিল, য'ত তেওঁ উন্নত এআই ব্যৱস্থাক মানুহৰ সুৰক্ষিত ব্যৱহাৰৰ বাবে কেনেকৈ উপযুক্ত কৰি তুলিব পাৰি, সেই বিষয়ে বহু বছৰ ধৰি অধ্যয়ন কৰি আহিছে। তেওঁ কয়,"মই বৰ্তমান অৱসৰৰ বাবে কোনো সঞ্চয় কৰা নাই। গুগলত কাম কৰাৰ সময়ৰ মোৰ এটা অৱসৰকালীন সঞ্চয় আঁচনি আছে, কিন্তু মই এটা দশক ধৰি তাত কোনো বৰঙণি আগবঢ়োৱা নাই ।"

আগন্তুক ১০ বছৰৰ ভিতৰত মানুহ জীয়াই নাথাকিব বুলি তেওঁ ৫০ শতাংশতকৈ অধিক নিশ্চিত নেকি বুলি সোধা এক প্ৰশ্নৰ উত্তৰত ছোৱাৰেছে কয়: "এই মুহূৰ্তত মোৰ ধাৰণা অনুসৰি আমাৰ হাতত আৰু এটা দশক সময় নথকাৰ সম্ভাৱনা ৫০% তকৈ অধিক।" তেওঁৰ ২০২৫ চনৰ কিতাপ "ইফ এনিৱান বিল্ডছ ইট, এভৰিৱান ডাইছ" (If Anyone Builds It, Everyone Dies) — যিখন তেওঁ MIRI-ৰ সহ-প্ৰতিষ্ঠাপক এলিয়েজাৰ য়ুডকোভস্কিৰ সৈতে যুটীয়াভাৱে লিখিছিল — তাত ছোৱাৰেছে যুক্তি দিছিল যে ছুপাৰইণ্টেলিজেন্ট বা অতি-বুদ্ধিমান এআই-য়ে এনে কিছুমান লক্ষ্য গঢ়ি তুলিব যিবোৰ ইয়াৰ নিৰ্মাতাসকলে কেতিয়াও ভবা নাছিল, আৰু ই নিশ্চিতভাৱে মানৱ জীৱনৰ অন্ত পেলাব।

মানৱ জাতিৰ বাবে এআই ভাবুকি হ'ব পাৰে বুলি উদ্বেগ প্ৰকাশ কৰা উদ্যোগটোৰ একমাত্ৰ শীৰ্ষস্থানীয় ব্যক্তি ছোৱাৰেছেই নহয় । এআই-ৰ 'গডফাদাৰ' (Godfather of AI) হিচাপে বহুলভাৱে পৰিচিত জিঅ'ফ্ৰী হিণ্টনেও ভৱিষ্যদ্বাণী কৰিছে যে এআই-য়ে মানৱ জাতিক নিজৰ নিয়ন্ত্ৰণলৈ আনিব পৰাৰ ১০ ৰ পৰা ২০ শতাংশ সম্ভাৱনা আছে ।