ভাৰত ৰত্ন সুধাকণ্ঠ ড০ ভূপেন হাজৰিকাৰ আজি পুণ্যতিথি

নিউজ ডেস্ক : আজি ৫ নৱেম্বৰ । ২০১১ চনৰ আজিৰ দিনটোতে অসমবাসীৰ পৰা চিৰবিদায় লৈছিল সুধাকণ্ঠ ড০ ভূপেন হাজৰিকাই । আজিৰ দিনটোতে মুম্বাইৰ কোকিলাবেন ধীৰুভাই আম্বানি হাস্পতালত শেষ নিশ্বাস ত্যাগ কৰিছিল অসমৰ সাংস্কৃতিক জগতৰ মহীৰূহ, সুধাকণ্ঠ ড০ ভূপেন হাজৰিকাই ।

সেই মহান শিল্পীগৰাকীৰ আজি পঞ্চদশ পুণ্যতিথি । ৮৫ বছৰ বয়সত চিৰবিদায় লোৱা শিল্পীগৰাকী কেৱল এগৰাকী গায়ক নাছিল, আছিল গীতিকাৰ, সুৰকাৰ, কবি, লেখক, সাংবাদিক, অভিনেতা, চলচ্চিত্ৰ নিৰ্মাতা আৰু এগৰাকী শক্তিশালী সাংস্কৃতিক কণ্ঠ । বিশ্ববৰেণ্য শিল্পীগৰাকীৰ সৃষ্টিৰ মাজেৰে অসম, ব্ৰহ্মপুত্ৰ, মানুহ আৰু মানৱতাৰ কথা প্ৰতিধ্বনিত হৈছিল ।

ভাৰত ৰত্ন হাজৰিকাৰ কণ্ঠই অসমৰ লোকসংগীতৰ সুৰক বৃহত্তৰ ভাৰতীয় সংগীতৰ পৰিসৰৰ সৈতে সংযোগ কৰিছিল । ‘মানুহে মানুহৰ বাবে’, ‘বিস্তীৰ্ণ পাৰৰে’, ‘মই এটি যাযাবৰ’, ‘জিলিকাব লুইতৰ পাৰ’-এনে অসংখ্য গীতৰ মাজেৰে শিল্পীগৰাকীয়ে মানুহৰ প্ৰতি মানুহৰ দায়বদ্ধতা, সমতা, সহমৰ্মিতা আৰু প্ৰেমৰ বাণী কঢ়িয়াই লৈ গৈছিল ।

ড০ ভূপেন হাজৰিকাৰ সুৰ আৰু কণ্ঠই ভাৰতীয় সংগীতত এক সুকীয়া পৰিচয় সৃষ্টি কৰাৰ লগতে আঞ্চলিক ভাষা আৰু সংস্কৃতিক বৃহত্তৰ পৰিসৰত প্ৰতিষ্ঠা কৰিছিল । হাজৰিকা চলচ্চিত্ৰৰ জগততো আছিল সমানেই সক্ৰিয় । সংগীত পৰিচালনা, গীত ৰচনা, অভিনয় আৰু চলচ্চিত্ৰ নিৰ্মাণ-বিভিন্ন ক্ষেত্ৰত ড০ ভূপেন হাজৰিকাই নিজৰ প্ৰতিভাৰ পৰিচয় দিছিল । 

১৯৯৩ চনত ‘ৰুদালী’ ছবিৰ বাবে লাভ কৰিছিল দাদাচাহেব ফাল্কে বঁটা। ২০০১ চনত লাভ কৰিছিল পদ্মভূষণ। পৰৱৰ্তী সময়ত ২০১৯ চনত মৰণোত্তৰভাৱে ভাৰতৰ সৰ্বোচ্চ অসামৰিক সন্মান ‘ভাৰত ৰত্ন’ৰে সন্মানিত কৰা হয়।