চৌদি আৰৱৰ ৰিয়াদৰ বিমানবন্দৰত পুনৰ মিছাইল আক্ৰমণ

উল্লেখ্য যে, শনিবাৰে ঠিক এদিন পূৰ্বে য়েমেনৰ ইৰাণ সমৰ্থিত হুথী বিদ্ৰোহীয়ে কৰা এক আক্ৰমণত ১৩ জন লোক নিহত আৰু ৩০০ তকৈও অধিক লোক আহত হৈছিল । য়েমেনত থকা চৌদি নেতৃত্বাধীন মিত্ৰশক্তিৰ বাহিনীয়ে কয় যে, ৰিয়াদৰ কিং খালিদ আন্তঃৰাষ্ট্ৰীয় বিমানবন্দৰৰ টাৰ্মিনেল ৪ ত মিছাইল আক্ৰমণ হৈছিল । যাৰ ফলত অগ্নিকাণ্ডৰ সৃষ্টি হয় । ইয়াৰ উপৰিও চৌদি বিমান প্ৰতিৰক্ষা বাহিনীয়ে বিমানবন্দৰৰ সমীপত কেইবাটাও মিছাইল প্ৰতিহত কৰে ।

একেদৰে দেওবাৰে দাম্মাম বিমানবন্দৰত হোৱা আক্ৰমণৰ কথা চৌদি আৰৱৰ অসামৰিক বিমান পৰিবহন কৰ্তৃপক্ষই নিশ্চিত কৰিছে আৰু কয় যে ক্ষয়-ক্ষতিৰ মূল্যায়ন পৰীক্ষাৰ কাম চলি আছে।

দাম্মাম বিমানবন্দৰত ৰানৱেৰে গৈ থকা এখন বিমানৰ ভিতৰত থকা এজন প্ৰত্যক্ষদৰ্শীয়ে জনোৱা মতে, স্থানীয় সময় অনুসৰি নিশা প্ৰায় ৮:৩০ বজাত কেইবাখনো ৰৈ থকা বিমানৰ ওচৰৰ মিছাইলে আঘাত কৰে, যাৰ ফলত জুই জ্বলি উঠে। ইয়াৰ পিছতে বিমানখন গেটলৈ ঘূৰি আহে আৰু যাত্ৰীসকলক বিমানৰ পৰা নামি সেই স্থান ত্যাগ কৰিবলৈ কোৱা হয়।

চৌদিৰ বিমানবন্দৰসমূহৰ ওপৰত হোৱা আক্ৰমণত এসপ্তাহৰ ভিতৰত নিহতৰ সংখ্যা ১৮ জনলৈ বৃদ্ধি পাইছে।

শনিবাৰে ৰিয়াদ বিমানবন্দৰত হোৱা আক্ৰমণত ৪ গৰাকী চৌদি নাগৰিককে ধৰি ১৩ জন লোক নিহত হৈছিল, আনহাতে বাকী ভুক্তভোগীসকল বিদেশী নাগৰিক আছিল বুলি চৌদি কৰ্তৃপক্ষই জানিবলৈ দিয়ে। নিহতসকলৰ ভিতৰত ৪৬ বছৰীয়া ভাৰতীয় নাগৰিক মহম্মদ ইউছুফো আছিল।

হুথীৰ সামৰিক মুখপাত্ৰ য়াহ্য ছাৰীয়ে দেওবাৰে এক টেলিভিছন ভাষণত শনিবাৰৰ আক্ৰমণৰ দায়িত্ব স্বীকাৰ কৰে । তেওঁ লগতে কয় যে এই গোটে পূৰ্বীয় প্ৰদেশৰ দাম্মামৰ কিং ফাহদ আন্তঃৰাষ্ট্ৰীয় বিমানবন্দৰ আৰু চৌদিৰ তেল প্ৰতিষ্ঠান চৌদি আৰামকোৰ দুটা প্ৰতিষ্ঠানক আক্ৰমণৰ লক্ষ্য কৰি লোৱা হৈছিল ।

চৌদি আৰৱত থকা ব্ৰিটেইনৰ দূতাবাসে নিজৰ নাগৰিকসকলক মদিনা বিমানবন্দৰৰ বাহিৰে জেণ্ডা, দাম্মাম আৰু দেশখনৰ আন সকলো বিমানবন্দৰলৈ জৰুৰী প্ৰয়োজন নহ'লে যাত্ৰা নকৰিবলৈ পৰামৰ্শ দিছে ।