বিশ্ব বজাৰলৈ ৰাছিয়াৰ ডিজেল আমদানী কৰাক লৈ চুক্তিৰ ঘোষণা ট্ৰাম্পৰ

নিউজ ডেস্ক: আমেৰিকা যুক্তৰষ্ট্ৰৰ ৰাষ্ট্ৰপতি ড'নাল্ড ট্ৰাম্পে দেশখনৰ "Lindsey O. Graham Sanctioning Russia and Iran Act" ৰ অধীনত ৰাছিয়াৰ বিৰুদ্ধে আৰোপ কৰা একাংশ প্ৰতিবন্ধকতা আৰু তেল ক্ৰেতা দেশৰ ওপৰত দিবলগীয়া ১০০ শতাংশ শুল্ক সাময়িকভাৱে স্থগিত বা ৰেহাই দি এটা কাৰ্যবাহী নিৰ্দেশত স্বাক্ষৰ কৰিছে।

উল্লেখ্য যে, এই মাহৰ আৰম্ভণিতে, ড’নাল্ড ট্ৰাম্পে বিশ্বৰ বজাৰলৈ ৰাছিয়াৰ ডিজেল আমদানী কৰাৰ বাবে এক চুক্তিৰ কথা ঘোষণা কৰে। আমেৰিকা-ইজৰাইল আৰু ইৰানৰ যুদ্ধৰ বাবে বৃদ্ধি পোৱা শক্তিৰ মূল্য হ্ৰাস কৰাৰ উদ্দেশ্যে এই পদক্ষেপ গ্ৰহণ কৰা হৈছে। এই সন্দৰ্ভত আমেৰিকাৰ ট্ৰেজাৰী বিভাগে ২০২৭ চনৰ এপ্ৰিল মাহলৈকে ৰাছিয়াৰ ডিজেল বিক্ৰীৰ ওপৰত থকা নিষেধাজ্ঞা প্ৰত্যাহাৰ কৰিছে।

ৰাছিয়াৰ শক্তি খণ্ডৰ প্ৰতি ড’নাল্ড ট্ৰাম্পৰ সমৰ্থনে ইউক্ৰেইন, ইউৰোপীয় অংশীদাৰ আৰু বহুতো আমেৰিকান বিষয়াক ক্ষুব্ধ কৰি তুলিছে। তেওঁলোকৰ মতে, এই পদক্ষেপে মস্কোক পুৰস্কৃত কৰিছে, আনহাতে ৰাছিয়াই নিজৰ চুবুৰীয়া দেশখনৰ বিৰুদ্ধে চাৰে চাৰি বছৰ ধৰি যুদ্ধ চলাই গৈছে।

ইউক্ৰেইনৰ ৰাষ্ট্ৰপতি ভল’ডিমিৰ জেলেনস্কিয়ে আমেৰিকাৰ ৰাষ্ট্ৰপতি ড'নাল্ড ট্ৰাম্পৰ ৰাছিয়াৰ সৈতে হোৱা ডিজেল চুক্তিক তীব্ৰ সমালোচনা কৰে। তেওঁ ইয়াক ৰাছিয়াৰ ৰাষ্ট্ৰপতি ব্লাডিমিৰ পুটিনলৈ এক উপহাৰ বুলি অভিহিত কৰে, যিয়ে পুটিনক তেওঁৰ যুদ্ধৰ পুঁজি যোগান ধৰাত সহায় কৰিব।

ইউৰোপীয় দেশসমূহেও ৰাছিয়াৰ শক্তি গ্ৰহণ কৰাক লৈ ট্ৰাম্পক সমালোচনা কৰিছে যদিও, আমেৰিকাৰ ৰাষ্ট্ৰপতিগৰাকীয়ে তেওঁলোকক "কপটতা" বা "দুপুখী নীতি"ৰ বাবে অভিযুক্ত কৰিছে। কাৰণ পৰিসংখ্যাই দেখুৱাইছে যে ইউৰোপীয় ইউনিয়নৰ দেশসমূহে এতিয়াও ৰাছিয়াৰ গেছ আমদানি কৰা অব্যাহত ৰাখিছে।

ট্ৰাম্পে কোনবোৰ নিষেধাজ্ঞা পৰিহাৰ কৰিছে?

আমেৰিকা যুক্তৰাষ্ট্ৰৰ ৰাষ্ট্ৰপতি ড'নাল্ড ট্ৰাম্পে শুক্ৰবাৰে এক কাৰ্যবাহী নিৰ্দেশ জাৰি কৰি কাৰ্যকৰী হ’বলগীয়া ৰাছিয়া সম্পৰ্কীয় কেইবাটাও গুৰুত্বপূৰ্ণ নিষেধাজ্ঞা স্থগিত ৰাখে। তেওঁৰ এই কাৰ্যবাহী নিৰ্দেশৰ জৰিয়তে ৰাছিয়াৰ সামগ্ৰীৰ ওপৰত শুল্ক আৰোপ কৰা আৰু দেশখনৰ তেল তথা গেছ ক্ৰয় কৰাৰ বাবে জৰিমনা বিহাৰ দৰে পৰিকল্পিত পদক্ষেপসমূহ কাৰ্যকৰী হোৱাৰ কেইদিনমান পূৰ্বে বাতিল কৰা হয়।

তথ্য অনুসৰি, বৰ্তমান অৱৰুদ্ধ কৰা ব্যৱস্থাসমূহ বিগত মাহত কংগ্ৰেছত দ্বিপাক্ষিক সমৰ্থনেৰে গৃহীত হোৱা এক আইনৰ অংশ আছিল, যাৰ নামকৰণ কৰা হৈছিল ৰাছিয়াৰ এজন প্ৰবল সমালোচক, প্ৰয়াত আমেৰিকান চিনেটৰ লিন্ডছে গ্ৰাহামৰ নামেৰে।

আমেৰিকাত ৰাছিয়াৰ কেঁচা তেল বা গেছ আমদানি কৰা শীৰ্ষ পাঁচখন দেশৰ পৰা আমদানি কৰা সকলো সামগ্ৰীৰ ওপৰত ১০০ শতাংশলৈকে শুল্ক আৰোপ কৰাৰ কথা আছিল। আইনখন কাৰ্যকৰী হোৱাৰ ৩০ দিনৰ ভিতৰত ইচ্ছাকৃতভাৱে ৰাছিয়াৰ পৰা তেল বা গেছ ক্ৰয় কৰা দেশসমূহৰ ওপৰত বা মস্কোৰ তেল বিক্ৰীৰ নিষেধাজ্ঞা উলংঘা কৰাত সহায় কৰা শীৰ্ষ পাঁচখন দেশৰ ওপৰতো একেধৰণৰ শাস্তি আৰোপ কৰিব পাৰিলেহেঁতেন।

কাৰ্যবাহী আদেশ অনুসৰি, ট্ৰাম্প প্ৰশাসনে "অধিক ব্যৱস্থা গ্ৰহণ কৰাটো উপযুক্ত" বুলি বিবেচনা নকৰালৈকে এই ৰেহাই বাহাল থাকিব।

ভাৰ্জিনিয়াৰ ডেম’ক্ৰেট দলীয় মাৰ্কিন সাংসদ ডন বায়াৰে কয় যে, প্ৰতিবন্ধক প্ৰত্যাহাৰ কৰাৰ এই সিদ্ধান্ত পুটিনৰ ওচৰত আত্মসমৰ্পণ কৰাৰ দৰে, যিয়ে আমাৰ ইউক্ৰেনীয় অংশীদাৰসকলক প্ৰতাৰণা কৰে আৰু কংগ্ৰেছৰ স্পষ্ট উদ্দেশ্যক অৱজ্ঞা কৰে।

ভিয়েনা ইনষ্টিটিউট ফৰ ইন্টাৰনেচনেল ইক’নমিক ষ্টাডিজৰ অৰ্থনীতিবিদ ভাছিলী আষ্ট্ৰভে এটা আন্তঃৰাষ্ট্ৰীয় সংবাদ প্ৰতিষ্ঠানৰ আগত প্ৰকাশ কৰে যে, ৰাছিয়ান চৰকাৰেই সম্ভৱতঃ ইয়াৰ আটাইতকৈ ডাঙৰ লাভান্বিত হ'ব, কাৰণ নিষেধাজ্ঞা শিথিল কৰাৰ অৰ্থ হ'ল ৰাছিয়াৰ তেলৰ ওপৰত অতিৰিক্ত ৰেহাই দিব নালাগিব। অধিক জানিবলৈ আল জাজিৰাৰ ৱেবছাইট পৰিদৰ্শন কৰক।

পুতিনৰ বিশেষ প্ৰতিনিধি তথা ৰাছিয়াৰ চৰকাৰী বিষয়া কিৰিল ড্মিট্ৰিয়েভে নিষেধাজ্ঞা প্ৰত্যাহাৰ কৰাৰ আমেৰিকা যুক্তৰাষ্ট্ৰৰ সিদ্ধান্তক আদৰণি জনাই ইয়াক এক “গুৰুত্বপূৰ্ণ আৰু সঁচাকৈয়ে ঐতিহাসিক মুহূৰ্ত” বুলি অভিহিত কৰে।

অন্যান্য হিতাধিকাৰীসকলৰ ভিতৰত ৰাছিয়াৰ তেল আৰু গেছৰ প্ৰধান আমদানিকৰ্তা দেশসমূহ, যেনে চীন আৰু ভাৰত অন্তৰ্ভুক্ত, যিসকল এতিয়া আমেৰিকা যুক্তৰাষ্ট্ৰৰ দ্বিতীয় পৰ্যায়ৰ নিষেধাজ্ঞাৰ আশংকাৰ পৰা কম ক্ষতিগ্ৰস্ত হ'ব।

যদিও ট্ৰাম্পে আশা কৰিছে যে, এই ব্যৱস্থাসমূহে নৱেম্বৰৰ মধ্যৱৰ্তীকালীন নিৰ্বাচনৰ পূৰ্বে আমেৰিকাৰ গ্ৰাহকসকলৰ বাবে তেলৰ মূল্য হ্ৰাস কৰাত সহায় কৰিব, বিশেষজ্ঞসকলে কয় যে সেয়া কম নিশ্চিত।

ইউৰোপীয় ইউনিয়নৰ অৰ্থনীতি প্ৰধান ভলডিছ ডমব্ৰোভস্কিছে কয় যে, ৰাছিয়াৰ সৈতে আমেৰিকা যুক্তৰাষ্ট্ৰৰ শেহতীয়া ডিজেল চুক্তিয়ে বিশ্ব বজাৰত ইন্ধনৰ মূল্য হ্ৰাস কৰাৰ ক্ষেত্ৰত কোনো বিশেষ প্ৰভাৱ পেলোৱাৰ সম্ভাৱনা নাই। 

ট্ৰাম্পৰ মতে, এই চুক্তিৰ জৰিয়তে আমেৰিকা যুক্তৰাষ্ট্ৰ আৰু বিশ্বৰ বজাৰত তৎক্ষণাত" ৩,০০,০০০ টন ডিজেল ইন্ধন উপলব্ধ হ’ব, ইয়াৰ পিছত নৱেম্বৰ মাহত ৫,০০,০০০ টন আৰু পৰৱৰ্তী সময়ত ১ নিযুত টন ডিজেল যোগান ধৰা হ’ব।

ইউৰোপীয় ইউনিয়নৰ কাৰ্যবাহী উপ-সভাপতি ভালডিছ ডম্ব্ৰোভস্কিছে এটা সংবাদ সংস্থাক দিয়া সাক্ষাৎকাৰত কয়, "যদি আমি পৰিমাণবোৰলৈ লক্ষ্য কৰোঁ, তেন্তে সেইবোৰৰ কোনো ডাঙৰ মেক্ৰ’ইকনমিক (সামগ্ৰিক অৰ্থনৈতিক) গুৰুত্ব নাই। তদুপৰি, ৰাছিয়াই আচলতে সেই পৰিমাণৰ যোগান ধৰিবলৈ সক্ষম হ’ব নে নাই, সেই লৈও তীব্ৰ সন্দেহ আছে। লগতে আমেৰিকাৰ গুণগত মানদণ্ড অনুসৰিও এইবোৰ ডাঙৰ প্ৰশ্নবোধক চিন হৈ পৰিছে।"

চেন্টাৰ ফৰ ৰিচাৰ্চ অন এনাৰ্জী এণ্ড ক্লীন এয়াৰ নামৰ এটা অলাভকাৰী চিন্তা গোটৰ তথ্য অনুসৰি, চীন আৰু ভাৰত হৈছে ৰাছিয়াৰ খাৰুৱা তেলৰ সৰ্ববৃহৎ ক্ৰেতা। ছেপ্টেম্বৰ মাহত চীনে ৬ বিলিয়ন ইউৰো আৰু ভাৰতে ৩.৬ বিলিয়ন ইউৰ মূল্যৰ খাৰুৱা তেল ক্ৰয় কৰিছে। 

তথ্য অনুসৰি, ৰাছিয়াৰ খাৰুৱা তেল নিষিদ্ধকৰণৰ পৰা ৰেহাই পোৱা ইউৰোপীয় ইউনিয়নৰ (EU) স্থল আবদ্ধ সদস্য দেশ হাংগেৰী আৰু শ্ল’ভাকিয়া এতিয়াও ইয়াৰ ডাঙৰ গ্ৰাহক হৈ আছে, যিয়ে ছেপ্টেম্বৰ মাহত একেলগে ২৯০ নিযুত ইউৰো মূল্যৰ এই সামগ্ৰী ক্ৰয় কৰিছে। থিংক টেংকটোৱে লগতে কয় যে, একেটা মাহতে তুৰস্কই ১৭২ নিযুত ইউৰো মূল্যৰ ৰাছিয়াৰ খাৰুৱা তেল আমদানী কৰিছে।

২০২২ চনৰ শেষৰ পৰা ৰাছিয়াৰ তেলজাত সামগ্ৰীৰ আটাইতকৈ বেছি আমদানি কৰা দেশসমূহ হৈছে তুৰস্ক, চীন, চৌদি আৰৱ,ব্ৰাজিল আৰু ছিংগাপুৰ।

ছেপ্টেম্বৰ মাহত চৌদি আৰৱে আটাইতকৈ বেছি ৰাছিয়ান তেলজাত সামগ্ৰী আমদানি কৰে, যাৰ মূল্য আছিল ৫৩৪ নিযুত ইউৰো ($৬০০ নিযুত)।

এই সপ্তাহত ব্ৰাছেলছত অনুষ্ঠিত হোৱা দুদিনীয়া ইউৰোপীয় পৰিষদৰ বৈঠকৰ অন্তত গ্ৰহণ কৰা এক যৌথ বিবৃতিত ইউৰোপীয় নেতাসকলে কয় যে, ৰাছিয়াৰ ডিজেলৰ ওপৰত আৰোপ কৰা নিষেধাজ্ঞা আমেৰিকাই সাময়িকভাৱে প্ৰত্যাহাৰ কৰাৰ সিদ্ধান্তক লৈ ইউৰোপীয় পৰিষদ দুঃখিত। 

উল্লেখ্য যে, ৰাছিয়াৰ তেলৰ ওপৰত নিজাকৈ প্ৰায় সম্পূৰ্ণ নিষেধাজ্ঞা থকা স্বত্বেও, ইউৰোপীয় ইউনিয়নে (EU) বুজন পৰিমাণৰ ৰাছিয়াৰ গেছ আমদানি কৰি আহিছে, যদিও অহা বছৰৰ ভিতৰত এই আমদানি পৰ্যায়ক্ৰমে বন্ধ কৰাৰ পৰিকল্পনা কৰিছে।

জাৰ্মান গৱেষণা সংস্থা উৰ্গেৱাল্ডে প্ৰকাশ কৰা এক প্ৰতিবেদন অনুসৰি, এই বছৰৰ জানুৱাৰীৰ পৰা ছেপ্টেম্বৰ মাহৰ ভিতৰত ইইউ বন্দৰসমূহলৈ ১২.১৮ নিযুত টন ৰাছিয়ান আৰ্কটিক এল.এন.জি. পৰিবহন কৰা হৈছে, যি গত বছৰৰ তুলনা ৯.৫ শতাংশ বৃদ্ধি পাইছে। এই সময়ছোৱাত ইইউ-য়ে ৰাছিয়ান আৰ্কটিক এল.এন.জি.ৰ বাবে প্ৰায় ৭.৮৮ বিলিয়ন ইউৰো খৰচ কৰিছে। 

তথ্য অনুসৰি, ছেপ্টেম্বৰ মাহত ইইউ (EU) দেশসমূহে ৮১৭ নিযুত ইউৰো (\(৯১৮ নিযুত) মূল্যৰ পাইপলাইন গেছ আৰু ৬১৫ নিযুত ইউৰো (\)৬৯১ নিযুত) মূল্যৰ তৰলীকৃত প্ৰাকৃতিক গেছ (LNG) আমদানি কৰিছিল।

গৱেষণা প্ৰতিষ্ঠানৰ মতে, ইউৰোপীয় ইউনিয়নৰ (EU) সদস্য ফ্ৰান্স আৰু নেদাৰলেণ্ড আটাইতকৈ ডাঙৰ LNG আমদানিকাৰক দেশ আছিল, যিয়ে ক্ৰমে ৪৪৬ নিযুত ইউৰো মূল্যৰ গেছ আমদানি কৰিছে। ইয়াত লগতে কয় যে, ফ্ৰান্সৰ এল.এন.জি. আমদানিৰ পৰিমাণ পূৰ্বৱৰ্তী মাহৰ তুলনাত ১০৩ শতাংশ বৃদ্ধি পাইছে।

ৰাছিয়াৰ সৈতে ট্ৰাম্পৰ ডিজেল চুক্তিৰ সন্দৰ্ভত ফ্ৰান্সৰ ৰাষ্ট্ৰপতি ইমানুৱেল মেক্ৰনে আটাইতকেই সৰৱ ভূমিকা গ্ৰহণ কৰিছে আৰু শুকুৰবাৰে তেওঁ কয় যে ই এটা নেতিবাচক বাৰ্তা প্ৰেৰণ কৰে আৰু গোলকীয় মূল্যৰ ওপৰত ইয়াৰ কোনো প্ৰভাৱ নপৰে।

হাংগেৰীয়ে সেই মাহত আন যিকোনো EU সদস্য দেশৰ তুলনাত আটাইতকৈ বেছি ৰাছিয়ান পাইপলাইন গেছ আমদানি কৰিছিল, যাৰ মূল্য আছিল ৪১৪ নিযুত ইউৰো ($৪৬৫ নিযুত)। চিআৰইএ (CREA) ৰ তথ্য অনুসৰি, স্লোভাকিয়া আৰু বুলগেৰিয়াই ক্ৰমে ১৬১ নিযুত ইউৰো মূল্যৰ গেছ আমদানি কৰিছিল।