হুথি আক্ৰমণত বিপৰ্যস্ত চৌদি আৰৱৰ আকাশপথ, বাতিল ৪ হাজাৰতকৈও অধিক বিমানৰ উৰণ

ইৰানৰ সমৰ্থিত শিয়া বিদ্ৰোহীসকলৰ ক্ষেপণাস্ত্ৰ আৰু ড্ৰোন আক্ৰমণৰ ফলত ছৌদি আৰৱৰ আকাশপথত ইতিমধ্যে বৃহৎ বিপৰ্যয়ৰ সৃষ্টি হৈছে। বাতিল কৰা হৈছে ৪ হাজাৰতকৈও অধিক বিমানৰ উৰণ। বিমান পৰিবহণ সম্পৰ্কীয় তথ্য বিশ্লেষক প্ৰতিষ্ঠান চিৰিয়ামে সোমবাৰে এই তথ্য প্ৰকাশ কৰিছে।

তথ্য অনুসৰি, , ৮ অক্টোবৰৰ পৰা ২৫ অক্টোবৰলৈকে ৰিয়াদৰ কিং খালিদ আন্তঃৰাষ্ট্ৰীয় বিমানবন্দৰৰ পৰা নিৰ্ধাৰিত মুঠ ৪,৭৩৬খন বিমানৰ ভিতৰত ৪,০৭১খনৰ উৰণ বাতিল কৰা হৈছে।

আনহাতে, হুথি বিদ্ৰোহীসকলৰ দাবী অনুসৰি, সোমবাৰে তেওঁলোকে পুনৰ ৰিয়াদ বিমানবন্দৰলৈ বেলিষ্টিক ক্ষেপণাস্ত্ৰ নিক্ষেপ কৰে। উল্লেখ্য যে, অক্টোবৰৰ আৰম্ভণিতে ইৰানৰ সমৰ্থিত বিদ্ৰোহী সংগঠনটোৱে এক বিবৃতিৰ জৰিয়তে সকলো বিমান পৰিবহণ সংস্থাক সতৰ্ক কৰি দিছিল। চৌদি আৰৱৰ বিমানবন্দৰ আৰু আকাশমাৰ্গ ব্যৱহাৰ নকৰিবলৈ ‘পৰামৰ্শ’ দিছিল সংগঠনটোৱে। লগতে সদৰী কৰে যে, পবিত্ৰ চহৰ মক্কা আৰু মদিনাৰ বিমানবন্দৰকেইটা বাদ দি চৌদি আৰৱৰ প্ৰতিটো বিমানবন্দৰকে ‘ৰণক্ষেত্ৰ’ত পৰিণত কৰা হ’ব।