উল্লেখ্য যে, গড়লত সেই ঘটনাটো সংঘটিত হোৱাৰ পাছতে মহানগৰীৰ হোমষ্টে’ সমূহৰ সুৰক্ষা আৰু নিয়ন্ত্ৰণ ব্যৱস্থাক লৈ প্ৰশ্ন উঠিছে। এনে পৰিস্থিতিত হোমষ্টে’সমূহৰ পৰিচালন ব্যৱস্থাক অধিক সুশৃংখলিত আৰু দায়বদ্ধ কৰাৰ ওপৰত গুৱাহাটী পৌৰ নিগমে গুৰুত্ব আৰোপ কৰিছে।
প্ৰস্তাৱিত ব্যৱস্থা অনুসৰি, গুৱাহাটীত হোমষ্টে’ স্থাপন কৰিবলৈ হ’লে সংশ্লিষ্ট কৰ্তৃপক্ষৰ পৰা প্ৰয়োজনীয় অনুজ্ঞাপত্ৰ সংগ্ৰহ কৰাৰ লগতে সকলো প্ৰাসংগিক নথি-পত্ৰ সংৰক্ষণ কৰিব লাগিব। ইয়াৰোপৰি হোমষ্টে’ থকা স্থানত সহজে চিনাক্ত কৰিব পৰাকৈ উপযুক্ত ছাইনব’ৰ্ড লগোৱাটোও বাধ্যতামূলক কৰা হ’ব।
তাৰোপৰি নতুনকৈ হোমষ্টে’ আৰম্ভ কৰাৰ পূৰ্বে ওচৰ-চুবুৰীয়া আৰু স্থানীয় বাসিন্দাসকলৰ পৰা অনাপত্তি প্ৰমাণপত্ৰ সংগ্ৰহ কৰাৰ ব্যৱস্থাও থাকিব লাগিব বুলি তথ্য অনুসৰি জানিব পৰা গৈছে। ইয়াৰ জৰিয়তে হোমষ্টে’ স্থাপনৰ ক্ষেত্ৰত স্থানীয় লোকৰ মতামত আৰু চুবুৰীয়া অঞ্চলৰ পৰিৱেশৰ বিষয়টো বিবেচনা কৰাৰ লক্ষ্য নিৰ্ধাৰণ কৰা হৈছে।
ইয়াৰ লগতে গুৱাহাটীত প্ৰযোজ্য নিয়ম অনুসৰি প্ৰয়োজনীয় অনুজ্ঞাপত্ৰ অবিহনে চলি থকা হোমষ্টে’সমূহৰ বিৰুদ্ধে ব্যৱস্থা গ্ৰহণ কৰা হ’ব। নিয়ম উলংঘন কৰি হোমষ্টে’ পৰিচালনা কৰা প্ৰতিষ্ঠানসমূহৰ ক্ষেত্ৰত সংশ্লিষ্ট কৰ্তৃপক্ষই প্ৰযোজ্য বিধি অনুসৰি পদক্ষেপ ল’ব পাৰিব।
মন্তব্য (0)
লগইন কৰি মন্তব্য লিখক।