আমেৰিকা যুক্তৰাষ্ট্ৰৰ মধ্যৱৰ্তীকালীন নিৰ্বাচন, হাত-ভৰি বান্ধ খাব নেকি ট্ৰাম্পৰ !

নিউজ ডেস্ক : যুদ্ধ আৰু ইয়াৰ ফলত বিশ্বৰ অৰ্থনীতিত হোৱা ব্যাপক খেলিমেলিৰ মাজতে আজি আমেৰিকা যুক্তৰাষ্ট্ৰত ৰাষ্ট্ৰপতিৰ মধ্যৱৰ্তীকালীন নিৰ্বাচন । তাৰ মাজতে ইৰানৰ দুটাকৈ স্থানত আমিৰকা যুক্তৰাষ্ট্ৰই আক্ৰমণ কৰিছে ।

আমেৰিকা যুক্তৰাষ্ট্ৰৰ মধ্যৱৰ্তীকালীন নিৰ্বাচন হৈছে দেশখনৰ ৰাজনৈতিক ব্যৱস্থাৰ এক অত্যন্ত গুৰুত্বপূৰ্ণ গণতান্ত্ৰিক প্ৰক্ৰিয়া । ৰাষ্ট্ৰপতিৰ ৪ বছৰীয়া কাৰ্যকালৰ ঠিক মাজভাগত (অৰ্থাৎ দ্বিতীয় বছৰৰ অন্তত) এই নিৰ্বাচন অনুষ্ঠিত হয় বাবেই ইয়াক "মধ্যৱৰ্তীকালীন" বা "মিডটাৰ্ম" নিৰ্বাচন বুলি কোৱা হয়।

এই নিৰ্বাচনত পোনপটীয়াকৈ ৰাষ্ট্ৰপতি পদৰ বাবে ভোটদান কৰা নহয়, কিন্তু ইয়াৰ ফলাফলে বহুখিনি ক্ষেত্ৰত বৰ্তমানৰ ৰাষ্ট্ৰপতিগৰাকীৰ ক্ষমতা আৰু ভৱিষ্যতৰ ৰাজনীতি নিৰ্ধাৰণ কৰে।

আমেৰিকা যুক্তৰাষ্ট্ৰৰ কাৰ্যভাৰ চম্ভালি থকা ৰাষ্ট্ৰপতিগৰাকীৰ ভৱিষ্যত আৰু দেশখনৰ নীতি-নিৰ্দেশনা কোন দিশে যাব, তাৰ এক ডাঙৰ অগ্নিপৰীক্ষা হয় মধ্যৱৰ্তীকালীন নিৰ্বাচনত। ৰাষ্ট্ৰপতিজনৰ কাৰ্যকালৰ দুবছৰ সম্পূৰ্ণ হোৱাৰ পিছত নৱেম্বৰ মাহৰ প্ৰথম মঙলবাৰে এই নিৰ্বাচন অনুষ্ঠিত হয়।

কাৰ বাবে হয় এই নিৰ্বাচন ?

আমেৰিকাৰ সংসদ বা ‘কংগ্ৰেছ’ (Congress) দুটা সদনেৰে গঠিত । এটা হৈছে হাউচ অব ৰিপ্ৰেজেণ্টেটিভছ (House of Representatives) বা নিম্নসদন আৰু চিনেট (Senate) বা উচ্চসদন । মধ্যৱৰ্তীকালীন নিৰ্বাচনত এই দুই সদনৰ বাবে ভোটগ্ৰহণ কৰা হয়।

নিম্ন সদন মুঠ ৪৩৫খন আসন থাকে । এই সদনৰ সদস্যসকলৰ কাৰ্যকাল মাত্ৰ ২ বছৰ। গতিকে, প্ৰতিটো মধ্যৱৰ্তীকালীন নিৰ্বাচনত আটাইকেইখন (৪৩৫খন) আসনৰ বাবে নতুনকৈ নিৰ্বাচন অনুষ্ঠিত হয়।

চিনেট বা উচ্চ সদন- আমেৰিকাৰ চিনেটত মুঠ ১০০গৰাকী সদস্য থাকে (প্ৰতিখন ৰাজ্যৰ পৰা ২ জনকৈ)। চিনেটৰ সদস্যসকলৰ কাৰ্যকাল ৬ বছৰ । কিন্তু একেলগে সকলোৰে নিৰ্বাচন নহয় । প্ৰতি দুই বছৰৰ অন্তৰে অন্তৰে প্ৰায় এক-তৃতীয়াংশ (১/৩) আসনৰ বাবে নিৰ্বাচন অনুষ্ঠিত হয়। মধ্যৱৰ্তীকালীন নিৰ্বাচনত সাধাৰণতে ৩৫খনমান আসনৰ বাবে যুঁজ হয় ।

যদি বৰ্তমানৰ ৰাষ্ট্ৰপতিজনৰ দলৰ কংগ্ৰেছৰ দুয়োটা সদনতে সংখ্যাগৰিষ্ঠতা থাকে, তেন্তে তেওঁলোকে নিজৰ ইচ্ছা অনুসৰি আইন প্ৰণয়ন আৰু বাজেট পাছ কৰিব পাৰে। কিন্তু যদি মধ্যৱৰ্তীকালীন নিৰ্বাচনত বিৰোধী দলে যিকোনো এটা বা দুয়োটা সদনতে সংখ্যাগৰিষ্ঠতা লাভ কৰে, তেন্তে ৰাষ্ট্ৰপতিৰ হাত-ভৰি বান্ধ খাই পৰে ।

বিৰোধী দলে কংগ্ৰেছ নিয়ন্ত্ৰণ কৰিলে ৰাষ্ট্ৰপতিৰ প্ৰতিটো ডাঙৰ বিল বা আঁচনিত বাধাৰ সৃষ্টি কৰিব পাৰে । তেনে পৰিস্থিতিত ৰাষ্ট্ৰপতিগৰাকীয়ে বিৰোধীৰ বিলসমূহ নাকচ কৰিবলৈ নিজৰ "ভেটো ক্ষমতা" (Veto Power) ব্যৱহাৰ কৰিবলগীয়া হয় ।

এই নিৰ্বাচনক চলিত চৰকাৰখনৰ কাম-কাজৰ ওপৰত জনসাধাৰণৰ এক মতামত হিচাপে গণ্য কৰা হয়। ইতিহাস সাক্ষী আছে যে, প্ৰায়ভাগ মধ্যৱৰ্তীকালীন নিৰ্বাচনতে ক্ষমতাত থকা ৰাষ্ট্ৰপতিজনৰ দলে কংগ্ৰেছত আসন হেৰুৱাব লগা হয়, কাৰণ ভোটাৰসকলে চৰকাৰৰ বিৰুদ্ধে ক্ষোভ উজাৰিবলৈ ইয়াৰ ব্যৱহাৰ কৰে ।