নিউজ ডেস্ক : আমেৰিকাৰ মধ্যৱৰ্তী নিৰ্বাচনত (মিডটাৰ্ম নিৰ্বাচন) ডেম’ক্ৰেটিক পাৰ্টিৰ বিজয়যাত্ৰা অব্যাহত আছে। ৰিপাব্লিকান পাৰ্টিৰ দুৰ্গ হিচাপে পৰিচিত মিছিছিপিতো এইবাৰ জয়লাভ কৰে ডেম’ক্ৰেটসকলে। মিছিছিপিৰ ছিনেটৰ আসনখন ৰিপাব্লিকানসকলৰ পৰা কাঢ়ি নি আমেৰিকাৰ ছিনেটত নিজৰ শক্তি বৃদ্ধি কৰিলে ডেম’ক্ৰেটসকলে।
তথ্য অনুসৰি, আমেৰিকাৰ আইনসভাৰ ১০০খন আসনবিশিষ্ট উচ্চ সদনত ডেম’ক্ৰেটিক পাৰ্টিৰ সদস্যৰ সংখ্যা ৫৪ৰ পৰা বৃদ্ধি পাই ৫৫ হ’ল। আনহাতে, ৰিপাব্লিকানসকলৰ হাতত থাকিল ৪৪খন আসন। আলাস্কাৰ আসনখনৰ ভোটগণনা এতিয়াও অব্যাহত আছে। তীব্ৰ প্ৰতিদ্বন্দ্বিতা চলি থাকিলেও তাত ড’নাল্ড ট্ৰাম্পৰ দলৰ প্ৰাৰ্থীগৰাকীৰ তুলনাত কিছু আগবাঢ়ি আছে ডেম’ক্ৰেটিক প্ৰাৰ্থীগৰাকী।
মিছিছিপিৰ ছিনেটৰ আসনখনত জয়লাভ কৰি দুটাকৈ নজিৰ গঢ়িলে ডেম’ক্ৰেটিক পাৰ্টিয়ে। ৰক্ষণশীল এই প্ৰদেশখনত দীৰ্ঘদিন ধৰি নিজৰ ৰাজনৈতিক আধিপত্য বজাই ৰাখিছিল ৰিপাব্লিকানসকলে। তাত সামান্য ব্যৱধানত জয়লাভ কৰিলেও ডেম’ক্ৰেটসকলৰ এই বিজয়ক যথেষ্ট তাৎপৰ্যপূৰ্ণ বুলি গণ্য কৰা হৈছে।
মিছিছিপিৰ ডেম’ক্ৰেটিক প্ৰাৰ্থী স্কট কলম এগৰাকী কৃষ্ণাংগ ব্যক্তি। ১৪০ বছৰৰ পিছত এই আসনৰ পৰা নিৰ্বাচিত হৈ এগৰাকী কৃষ্ণাংগ প্ৰতিনিধিয়ে আমেৰিকাৰ ছিনেটত প্ৰৱেশ কৰিবলৈ ওলাইছে। প্ৰসংগক্ৰমে, ৰঙা হৈছে ৰিপাব্লিকান পাৰ্টিৰ নিৰ্বাচনী ৰং আৰু নীলা হৈছে ডেম’ক্ৰেটিক পাৰ্টিৰ। সেয়েহে বহুতে ক’বলৈ লৈছে যে, ৰিপাব্লিকানসকলৰ দুৰ্গ হিচাপে পৰিচিত মিছিছিপিৰ ৰঙো এইবাৰ নীলা হ’ল।
মাৰ্কিন সংবাদ মাধ্যমৰ পৰিসংখ্যা অনুসৰি, ডেম’ক্ৰেটিক প্ৰাৰ্থীগৰাকীয়ে লাভ কৰিছে ৪৯.২ শতাংশ ভোট। আনহাতে, আমেৰিকাৰ ৰাষ্ট্ৰপতি ড’নাল্ড ট্ৰাম্পৰ দল ৰিপাব্লিকান পাৰ্টিৰ প্ৰাৰ্থী চিণ্ডি হাইড-স্মিথে লাভ কৰিছে ৪৮.৭ শতাংশ ভোট। ইয়াৰ পূৰ্বে এই আসনখনৰ পৰাই তেওঁ জয়লাভ কৰিছিল।
পৰাজয়ৰ ইংগিত পোৱাৰ পিছতে বুধবাৰে সন্ধিয়া (আমেৰিকাৰ স্থানীয় সময় অনুসৰি) ছ’চিয়েল মিডিয়াত এটা পোষ্ট কৰি ডেম’ক্ৰেটিক প্ৰাৰ্থীগৰাকীক অভিনন্দন জনায় তেওঁ। পোষ্টটোত তেওঁ লিখে, “আমি যিদৰে কাম কৰিছিলোঁ আৰু যি আশা কৰিছিলোঁ, সেই অনুসৰি ফলাফল লাভ কৰা নগ’ল। তথাপি মিছিছিপিৰ ভোটাৰসকলৰ সিদ্ধান্তক মই সন্মান জনাইছোঁ।”
জয়লাভৰ পিছত স্থানীয় এখন মহাবিদ্যালয়ৰ খেলপথাৰত ভাষণ দিয়ে ডেম’ক্ৰেটিক প্ৰাৰ্থী কলমে। মুকলি আকাশৰ তলত, জনসমাগমেৰে ভৰি পৰা এই সভাত তেওঁ কয়, “মিছিছিপিৰ জনসাধাৰণেই এই জয়ৰ প্ৰকৃত কাৰিকৰ।”
মিছিছিপিত ডেম’ক্ৰেটসকলৰ এই ‘ঐতিহাসিক’ জয়ৰ কাৰণ ব্যাখ্যা কৰিবলৈ গৈ আমেৰিকাৰ একাংশ বিশেষজ্ঞই মত প্ৰকাশ কৰিছে যে, দেশখনৰ অৰ্থনৈতিক অস্থিৰতা, ট্ৰাম্পৰ শুল্ক নীতি আৰু ইৰান নীতিক লৈ ক্ষুব্ধ হৈ পৰিছে ৰিপাব্লিকান ভোটাৰসকলৰ একাংশ।
তেওঁলোকৰ লগতে কৃষ্ণাংগ ভোটাৰসকলৰ ভোটৰ জৰিয়তেই ডেম’ক্ৰেটিক প্ৰাৰ্থীগৰাকীয়ে জয় নিশ্চিত কৰে। মধ্যৱৰ্তী নিৰ্বাচনত মিছিছিপিৰ উপৰি টেক্সাছ, ছাউথ কেৰ’লাইনা, কানছাছ আৰু আইৱাৰ দৰে ৰিপাব্লিকানসকলৰ দুৰ্গ হিচাপে পৰিচিত ৰাজ্যসমূহো নিজৰ দখললৈ আনিছে ডেম’ক্ৰেটিক পাৰ্টিয়ে।

মন্তব্য (0)
লগইন কৰি মন্তব্য লিখক।