মণিপুৰৰ কাংপকপিত গুলীয়াগুলী, গ্ৰেপ্তাৰ ৩ বিদ্ৰোহী সদস্যক

নিউজ ডেস্ক : শনিবাৰে সন্ধিয়া মণিপুৰৰ কাংপকপি জিলাৰ ছংজাং পাখাং খূল গাঁৱত এটা সশস্ত্ৰ দলে আক্ৰমণ চলোৱাৰ অভিযোগৰ পিছতে সন্দেহজনক সশস্ত্ৰ উগ্ৰপন্থী আৰু নিৰাপত্তাৰক্ষীৰ মাজত গুলীয়াগুলীৰ ঘটনা সংঘটিত হয়। এই ঘটনাত কোনো লোক হতাহত হোৱা নাই বুলি জানিব পৰা গৈছে।

আৰক্ষীয়ে প্ৰকাশ কৰা তথ্য অনুসৰি, বিয়লি প্ৰায় ৫ বজাত গাঁওখনত এই আক্ৰমণৰ ঘটনা সংঘটিত হয়। গাঁওখন চালৱা আৰক্ষী থানাৰ অন্তৰ্গত আৰু আৰক্ষী থানাখনৰ পৰা প্ৰায় ১৫ কিলোমিটাৰ উত্তৰে অৱস্থিত ।  নাম প্ৰকাশ কৰিবলৈ অনিচ্ছুক এগৰাকী জ্যেষ্ঠ আৰক্ষী বিষয়াই জনোৱা অনুসৰি, নাগা উগ্ৰপন্থী সংগঠনৰ সদস্য বুলি সন্দেহ কৰা সশস্ত্ৰ দুৰ্বৃত্তৰ দলটোৱে ছংজাং পাখাং গাঁৱৰ কাষতে থকা থংলাং আকুতপা গাঁৱৰ পৰা আক্ৰমণটো চলোৱা বুলি অভিযোগ উঠিছে। ছংজাং পাখাং গাঁওখন ছংজাং পাখাং কুকি গাঁও বুলিও পৰিচিত।

মণিপুৰ ৰাইফলছ আৰু ইণ্ডিয়ান ৰিজাৰ্ভ বেটেলিয়ন (আই আৰ বি)-ৰ জোৱানসকলে প্ৰত্যাক্ৰমণ কৰাত দুয়োপক্ষৰ মাজত প্ৰায় ৩০ মিনিট ধৰি গুলীয়াগুলী চলে। ইয়াৰ পিছতে সশস্ত্ৰ দলটোৱে অঞ্চলটোৰ পৰা পিছুৱাই যায় বুলি আৰক্ষী বিষয়াগৰাকীয়ে জানিবলৈ দিয়ে।

তথ্য অনুসৰি, এই ঘটনাৰ কেইদিনমান পূৰ্বে ৩ নৱেম্বৰত মণিপুৰ চৰকাৰে এখন উচ্চপৰ্যায়ৰ নিৰাপত্তা সম্পৰ্কীয় বৈঠকত সকীয়াই দিছিল যে, সাধাৰণ নাগৰিকৰ ওপৰত আক্ৰমণৰ সৈতে জড়িত বুলি প্ৰমাণিত হোৱা গোটসমূহক ৰাজ্যিক কেবিনেটে বেআইনী ঘোষণা কৰিব পাৰে। বৈঠকত এই সিদ্ধান্তও লোৱা হৈছিল যে, সাধাৰণ নাগৰিকৰ ওপৰত হিংসাত্মক কাৰ্যকলাপ অব্যাহত ৰখা গোটসমূহৰ বিৰুদ্ধে বেআইনী কাৰ্যকলাপ (প্ৰতিৰোধ) আইন (UAPA)ৰ অধীনত ব্যৱস্থা গ্ৰহণ কৰা হ’ব।

শুক্ৰবাৰে প্ৰকাশ কৰা এক বিবৃতিত মণিপুৰ আৰক্ষীয়ে জনায় যে, ৰাজ্যিক আৰক্ষী, কোব্ৰা, চিআৰপিএফ, বিএছএফ, অসম ৰাইফলছ আৰু সেনাবাহিনীৰ যৌথ দলে আক্ৰান্ত অঞ্চলসমূহত ঘেৰাও আৰু তালাচী অভিযান (CASO) চলাই থকাৰ লগতে চোৰাংচোৱা তথ্যৰ ভিত্তিত অভিযান অব্যাহত ৰাখিছে। আক্ৰমণৰ সৈতে জড়িত লোকসকলক চিনাক্ত কৰি তেওঁলোকৰ বিৰুদ্ধে আইনী ব্যৱস্থা গ্ৰহণ কৰাই এই অভিযানৰ উদ্দেশ্য।

আৰক্ষীয়ে জনোৱা অনুসৰি, নিৰাপত্তা ব্যৱস্থা অধিক শক্তিশালী কৰা হৈছে আৰু পৰিস্থিতিৰ ওপৰত তীক্ষ্ণ নজৰ ৰখা হৈছে। পৃথক অভিযানত তিনিজন বিদ্ৰোহী কেডাৰ গ্ৰেপ্তাৰ । শনিবাৰে পৃথক পৃথক বিদ্ৰোহবিৰোধী অভিযান চলাই নিৰাপত্তাৰক্ষীয়ে ইম্ফল পূব আৰু ইম্ফল পশ্চিম জিলাৰ পৰা নিষিদ্ধ ঘোষিত দুটা ভূগৰ্ভস্থ সংগঠনৰ সৈতে জড়িত তিনিজন সক্ৰিয় কেডাৰক গ্ৰেপ্তাৰ কৰে।

প্ৰথমটো অভিযানত ইম্ফল পূব কমাণ্ডো, ৩১ অসম ৰাইফলছ আৰু ৪ মহাৰ ৰেজিমেণ্টৰ এটা যুটীয়া দলে ইম্ফল আৰক্ষী থানাৰ অন্তৰ্গত ছাগোলবন্দ নেপ্ৰা মেজৰ লেইকাইৰ পৰা কাংলেইপাক কমিউনিষ্ট পাৰ্টি-পিপলছ ৱাৰ গ্ৰুপ (KCP-PWG)ৰ দুজন সক্ৰিয় কেডাৰক গ্ৰেপ্তাৰ কৰে।

গ্ৰেপ্তাৰ হোৱা লোক দুজনক ক্ৰমে ৪৩ বছৰীয়া টেকচাম ইবোমচা সিং ওৰফে এছ কে, যি ইম্ফল পূবৰ পুখাও লাইফাম মাখা লেইকাইৰ বাসিন্দা, আৰু ৩০ বছৰীয়া জেলিছ নংমেইকাপাম ওৰফে ছালাইতাৰেট বুলি চিনাক্ত কৰা হৈছে। তেওঁ ইম্ফল পশ্চিমৰ ছামুৰু আৱাং লেইকাইৰ বাসিন্দা।

উল্লেখ্য যে, KCP-PWG এটা নিষিদ্ধ ঘোষিত ভূগৰ্ভস্থ সংগঠন। ২০২৬ চনৰ ২১ জুলাইত সংগঠনটোৰ মুৰব্বী লাইশ্ৰাম ৰঞ্জিত ওৰফে তামংগানবাকে ধৰি ৪৬গৰাকী কেডাৰে মুখ্যমন্ত্ৰী য়ুমনাম খেমচান্দৰ নেতৃত্বাধীন বিজেপি চৰকাৰৰ ওচৰত আত্মসমৰ্পণ কৰিছিল। আত্মসমৰ্পণ কৰা কেডাৰসকলে ৰকেট চালিত গ্ৰেনেড (RPG)কে ধৰি কেইবাটাও অস্ত্ৰ-শস্ত্ৰও জমা দিছিল।

আন এটা বিদ্ৰোহবিৰোধী অভিযানত নিৰাপত্তাৰক্ষীয়ে ইম্ফল পূব জিলাৰ খুৰাই ছালানথং দলঙৰ সমীপৰ পৰা নিষিদ্ধ ঘোষিত কাংলেই য়াৱল কান্না লুপ (KYKL)ৰ এজন সক্ৰিয় কেডাৰক গ্ৰেপ্তাৰ কৰে।

প্ৰাথমিক জেৰাৰ সময়ত গ্ৰেপ্তাৰ হোৱা লোকজনে সাধাৰণ ৰাইজ, দোকানী আৰু আন লোকসকলৰ পৰা ধন দাবী কৰাৰ সৈতে জড়িত থকাৰ কথা স্বীকাৰ কৰা বুলি জানিব পৰা গৈছে।

ৰাজ্যখনত ধাৰাবাহিকভাৱে সংঘটিত হৈ থকা হিংসাত্মক ঘটনা আৰু ধন দাবীৰ পৰিপ্ৰেক্ষিতত মণিপুৰত নিৰাপত্তা অভিযান তীব্ৰতৰ কৰি তোলা হৈছে। এই অভিযানৰ মাজতে গ্ৰেপ্তাৰৰ ঘটনাকেইটা সংঘটিত হৈছে।