ছাফ চেম্পিয়নশ্বিপ ২০২৬ৰ প্ৰথমখন মেচতে ভাৰতৰ হাতত পাকিস্তান পৰাস্ত

নিউজ ডেস্ক : বৃহস্পতিবাৰে ঢাকাত অনুষ্ঠিত ছাফ চেম্পিয়নশ্বিপ ২০২৬-ৰ উদ্বোধনী মেচত পাকিস্তানক ৩-২ ব্যৱধানত ভাৰতে পৰাস্ত কৰি, ছাফ চেম্পিয়নশ্বিপ ২০২৬ত জয়ৰে যাত্ৰা আৰম্ভ কৰিছে । ভাৰতৰ এক দ্বিতীয় স্তৰৰ দলে মেচখন সুন্দৰভাৱে আৰম্ভ কৰে, য’ত ফ্ৰণ্টলাইনত সুহাইল আহমেদ ভাট এক ডাঙৰ ভাবুকি হিচাপে দেখা দিয়ে ।

এটা সুন্দৰ দলীয় আক্ৰমণৰ অন্তত মহম্মদ সুহাইৰৰ এটা উৎকৃষ্ট লো ক্ৰছৰ সহায়ত সুহাইলে এক সহজ টেপ-ইনৰ জৰিয়তে গ’ল দিয়াৰ যাত্ৰা আৰম্ভ কৰে । ইয়াৰ পিছত চেন্টাৰ ফৰৱাৰ্ডজনে নিজৰ দ্বিতীয়টো গ’ল কৰে, যেতিয়া তেওঁক পোনপটীয়াকৈ বল পাছ কৰা হৈছিল আৰু তেওঁ অতি শান্তভাৱে পাকিস্তানৰ গ’লকীপাৰ ইউচুফ বাটক মষিমূৰ কৰি বল নেটত সুমুৱাই দিয়ে।

নৌশাদ মুছাৰ অধীনৰ ভাৰতীয় দলটোৱে মিডফিল্ড আৰু বল পজেশ্যনৰ ওপৰত সম্পূৰ্ণ নিয়ন্ত্ৰণ বজাই ৰাখিছিল আৰু অতি সোনকালেই নৌফালে মঙলেনথাং কিপগেনক পাছ আগবঢ়ায়, যাৰ গতিপথ পাকিস্তানৰ মিডফিল্ডাৰসকলে ধৰিবই নোৱাৰিলে। বাটৰ সৈতে মুখামুখি হৈ তেওঁ এটা চিপ শ্বট মাৰে, যাৰ ফলত স্ক’ৰ ৩-০ হয়।

এই সময়ছোৱাত ভাৰতৰ আটাইতকৈ ডাঙৰ সমস্যা আছিল আত্মতুষ্টি আৰু ইয়াৰ বাবেই তেওঁলোক বিপদত পৰে, যেতিয়া অভিষেক সূৰ্যৱংশীয়ে ভাৰতৰ ডি বক্সৰ ভিতৰত হায়ান খাট্টাকক বাধা দিবলৈ গৈ এটা পেনাল্টী উপহাৰ দিয়ে। অৱশ্যে শ্বায়েক দোষ্টে লোৱা পেনাল্টীৰ শ্বটটো পোষ্টৰ বহুত ওপৰেৰে যোৱাত সেই সুযোগটো নষ্ট হয়।

দ্বিতীয়াৰ্ধত ভাৰতৰ খেলৰ গতি কিছু হ্ৰাস পাইছিল, কিন্তু নোলবেৰ্টো চোলানোৰ পাকিস্তান দলে বল বেছি সময় নিজৰ হাতত ৰাখিও ভাৰতক শলঠেকত পেলাব পৰা নাছিল। কিন্তু ইয়াৰ পিছতে ইভেণ্ট সলনি হয় যেতিয়া ইনজুৰী টাইম (ষ্টপেজ টাইম) আৰম্ভ হৈছিল।

প্ৰথমে জুনেইদ শ্বাহৰ এক সুন্দৰ ক্ৰছত নাজিবুল্লাই এক শক্তিশালী হেডাৰেৰে গ’ল কৰি স্ক’ৰ ৩-১ কৰে। ইয়াৰ মাত্ৰ কেইমিনিটমান পিছতে আলমগীৰ গাজিয়ে মেচখনৰ আটাইতকৈ আকৰ্ষণীয় গ’লটো কৰে। এটা সুন্দৰ প্ৰথম টাচেৰে নিজৰ বাবে সুযোগ সৃষ্টি কৰি তেওঁ পৰি যোৱাৰ অৱস্থাতে এক কঠিন কোণৰ পৰা ঘূৰি শ্বট মাৰি গ’ল কৰে।