নিউজ ডেস্ক: আজি শাৰদীয় নৱৰাত্ৰিৰ নৱম দিন তথা মহানৱমী। আজি দেৱী দুৰ্গাৰ নৱম ৰূপ মা সিদ্ধিদাত্ৰীক পূজা কৰা হয়। নৱদুৰ্গাৰ নৱম তথা অন্তিম ৰূপ মা সিদ্ধিদাত্ৰীৰ পূজাৰ আধ্যাত্মিক আৰু পৌৰাণিক তাৎপৰ্য অত্যন্ত গভীৰ। 'সিদ্ধি' মানে অলৌকিক শক্তি, জ্ঞান বা ধ্যান ক্ষমতা আৰু 'দাত্ৰী' মানে হ'ল দানকাৰী। অৰ্থাৎ, মা সিদ্ধিদাত্ৰী হৈছে সকলো প্ৰকাৰৰ সিদ্ধি আৰু আধ্যাত্মিক পূৰ্ণতা প্ৰদান কৰা দেৱী।
মহানৱমীৰ দিনা কৰা এই পূজাৰ প্ৰধান তাৎপৰ্য আছে।
অষ্টসিদ্ধিৰ প্ৰাপ্তি: মাৰ্কণ্ডেয় পুৰাণৰ মতে, জগতত আঠ প্ৰকাৰৰ মূল সিদ্ধি বা অলৌকিক ক্ষমতা আছে— অনিমা, মহিমা, গৰিমা, লঘিমা, প্ৰাপ্তি, প্ৰকাম্য, ঈশিত্ব আৰু বশিত্ব। মা সিদ্ধিদাত্ৰীয়েই এই সকলোবোৰ সিদ্ধি পৰিচালনা কৰে। আন্তৰিক হৃদয়েৰে মাৰ আৰাধনা কৰিলে সাধক আৰু ভক্তই এই সকলো যোগসিদ্ধি আৰু শক্তি লাভ কৰিব পাৰে।
সাধনাৰ পূৰ্ণতা আৰু মোক্ষ লাভ:নৱৰাত্ৰিৰ নদিনীয়া আধ্যাত্মিক যাত্ৰাৰ অন্তিম পৰ্যায় হৈছে মা সিদ্ধিদাত্ৰীৰ পূজা। মা শৈলপুত্ৰীৰ পৰা আৰম্ভ হোৱা সাধনা এই দিনটোতে সিদ্ধি আৰু আত্মোপলব্ধিলৈ ৰূপান্তৰিত হয়। ভক্তসকলে পাৰ্থিৱ কামনা-বাসনাৰ ঊৰ্ধ্বগত হৈ জীৱনৰ চৰম লক্ষ্য— আধ্যাত্মিক জ্ঞান আৰু মুক্তি (মোক্ষ) লাভৰ বাবে দেৱীৰ ওচৰত প্ৰাৰ্থনা জনায়
অৰ্ধনাৰীশ্বৰ ৰূপৰ তাৎপৰ্য: পৌৰাণিক বিশ্বাস অনুসৰি, ভগৱান শিৱই সকলো সিদ্ধি লাভ কৰিবলৈ মা সিদ্ধিদাত্ৰীক আৰাধনা কৰিছিল। দেৱীৰ কৃপাতে শিৱৰ শৰীৰৰ আধা অংশ দেৱী শক্তিৰ ৰূপলৈ সলনি হৈছিল আৰু তেওঁ 'অৰ্ধনাৰীশ্বৰ' নামেৰে জনাজাত হৈছিল। ই পুৰুষ (শিৱ) আৰু প্ৰকৃতি (শক্তি) অৰ্থাৎ বিশ্বব্ৰহ্মাণ্ডৰ সৃষ্টি আৰু স্থিতিৰ বাবে প্ৰয়োজনীয় দুয়োটা শক্তিৰ অনবদ্য ভাৰসাম্যৰ প্ৰতীক।
ত্ৰিমূৰ্তিক শক্তি প্ৰদান: কথা অনুসৰি, সৃষ্টিৰ আৰম্ভণিতে মা সিদ্ধিদাত্ৰীয়েই ব্ৰহ্মা, বিষ্ণু আৰু মহেশ্বৰক (শিৱ) সৃষ্টি, পালন আৰু সংহাৰৰ বাবে প্ৰয়োজনীয় ঐশ্বৰিক শক্তি আৰু অৰ্ধাংগিনীসকলক প্ৰদান কৰিছিল। সেইবাবে তেওঁক সমগ্ৰ বিশ্বব্ৰহ্মাণ্ডৰ মূল চালিকা শক্তি বুলি গণ্য কৰা হয়।
সাৰ্বজনীন কৃপা আৰু অজ্ঞতা দূৰীকৰণ: মা সিদ্ধিদাত্ৰীৰ বাহন সিংহ হ'লেও তেওঁ পদুম ফুলৰ ওপৰতো উপবিষ্ট হয়, যি আধ্যাত্মিক পৱিত্ৰতা আৰু নিৰ্লিপ্ততাৰ প্ৰতীক। তেওঁৰ পূজা কেৱল মানুহেই নহয়, দেৱতা, গন্ধৰ্ব, ঋষি-মুনি আনকি অসুৰসকলেও কৰে। মায়ে ভক্তৰ মনৰ পৰা অজ্ঞতা আৰু অহংকাৰ দূৰ কৰি জ্ঞানৰ পোহৰ বিলাই দিয়ে।
উল্লেখ্য যে, নৱৰাত্ৰিৰ নৱম দিনা মা সিদ্ধিদাত্ৰীক প্ৰসাদ বা ভোগ অৰ্পণ কৰাৰ বিশেষ ধৰ্মীয় গুৰুত্ব আছে। পৌৰাণিক বিশ্বাস অনুসৰি, এই দিনটোত দেৱীক তেওঁৰ প্ৰিয় বস্তুসমূহ নৈবেদ্য হিচাপে আগবঢ়ালে ঘৰলৈ সুখ-সমৃদ্ধি আহে আৰু সকলো মনস্কামনা পূৰ্ণ হয়।
* তিল : মা সিদ্ধিদাত্ৰীৰ আটাইতকৈ প্ৰিয় বস্তু হৈছে তিল। নৱম দিনা দেৱীক ক’লা বা বগা তিল আৰু তিলেৰে তৈয়াৰী বিভিন্ন মিঠাই বা লাডু ভোগ হিচাপে অৰ্পণ কৰা হয়। ইয়াৰ দ্বাৰা সাধকৰ অকাল মৃত্যুৰ ভয় দূৰ হয় বুলি বিশ্বাস কৰা হয়।
* হালৱা, পুৰী আৰু বুট ভজা: নৱৰাত্ৰিৰ নৱম দিনা তথা মহানৱমীত সমগ্ৰ ভাৰততে কুমাৰী পূজা (Kanya Puja) কৰা হয়। এই পূজাত দেৱীৰ স্বৰূপ কন্যা শিশুসকলক আৰু মা সিদ্ধিদাত্ৰীক ঘৰতে তৈয়াৰ কৰা শুদ্ধ সাট্বিক চুজিৰ হালৱা, ঘিঁউত ভজা পুৰী আৰু ক’লা বুট ভজা ভোগ হিচাপে আগবঢ়োৱাটো অত্যন্ত শুভ আৰু পৰম্পৰাগত নিয়ম।
*পায়স বা ক্ষীৰ: মাক গাখীৰ আৰু চাউলেৰে প্ৰস্তুত কৰা সুস্বাদু ক্ষীৰ বা পায়স নৈবেদ্য হিচাপে আগবঢ়োৱা হয়। এই অন্নভোগে পৰিয়ালত মানসিক শান্তি আৰু স্থিৰতা কঢ়িয়াই আনে।
*নাৰিকল আৰু ঋতুভিত্তিক ফল: নাৰিকল আৰু ঋতুভিত্তিক সতেজ ফল-মূল অৰ্পণ কৰা হয়। বহু ঠাইত নাৰিকলেৰে তৈয়াৰী নাডু বা মিঠাইও ভোগত ৰখা হয়।
দেৱী সিদ্ধিদাত্ৰীৰ মূল স্তুতি মন্ত্ৰটো হ'ল:
"या देवी सर्वभूतेषु माँ सिद्धिदात्री रूपेण संस्थिता।
नमस्तस्यै नमस्तस्यै नमस्तस्यै नमो नमः॥"
মন্তব্য (0)
লগইন কৰি মন্তব্য লিখক।