আজি পৱিত্ৰ নৱৰাত্ৰিৰ পঞ্চম দিন

নিউজ ডেস্ক:  আজি পৱিত্ৰ নৱৰাত্ৰিৰ পঞ্চম দিন। নৱৰাত্ৰিৰ পঞ্চম দিনটোত দেৱী দুৰ্গাক মা স্কন্দমাতা ৰূপত পূজা-অৰ্চনা কৰা হয়। ভগৱান কাৰ্তিক (যাৰ আন এটা নাম স্কন্দ) ৰ মাতৃ হোৱাৰ বাবেই দেৱীৰ এই নামকৰণ হৈছে।

নৱৰাত্ৰিৰ পঞ্চম দিনা উদযাপন কৰা এই মা স্কন্দমাতাৰ পূজাৰ তাৎপৰ্য অতি গভীৰ আৰু কল্যাণকাৰী। তেওঁ কেৱল শক্তিৰ দেৱীয়েই নহয়, বৰঞ্চ চেনেহী মাতৃৰ এক অনন্য প্ৰতীক।

উল্লেখ্য যে, মা স্কন্দমাতাৰ পূজাৰ বহু মূল আধ্যাত্মিক আৰু ধাৰ্মিক তাৎপৰ্য আছে।

* মাতৃত্ব আৰু সন্তানৰ সুৰক্ষা: মা স্কন্দমাতা হৈছে ঐশ্বৰিক মাতৃত্ব আৰু লালন-পালনৰ প্ৰতীক. তেওঁ নিজৰ কোলাত পুত্ৰ কাৰ্তিকক (স্কন্দ) ধাৰণ কৰি সুৰক্ষা দিয়ে। সেয়েহে, নিঃসন্তান দম্পতীয়ে সন্তান সুখ লাভৰ বাবে আৰু পিতৃ-মাতৃয়ে নিজৰ সন্তানৰ সুস্বাস্থ্য, দীৰ্ঘায়ু তথা নিৰাপত্তাৰ বাবে এই পূজা কৰে।

*একেলগে দুটা আশীৰ্বাদ: এই পূজাৰ আটাইতকە ডাঙৰ বিশেষত্ব হ’ল যেতিয়া এজন ভক্তই মা স্কন্দমাতাৰ আৰাধনা কৰে, তেতিয়া দেৱীৰ কোলাত থকা শিশু কাৰ্তিকৰো স্বয়ংক্ৰিয়ভাৱে পূজা কৰা হয়। ফলত ভক্তই মাতৃ আৰু পুত্ৰ দুয়োৰে আশীৰ্বাদ একেলগে লাভ কৰে।

*জ্ঞান আৰু বুদ্ধিৰ বিকাশ: ধৰ্মীয় বিশ্বাস অনুসৰি, মা স্কন্দমাতাৰ কৃপাত অতি দুৰ্বল বুদ্ধিৰ মানুহৰো জ্ঞানৰ বিকাশ ঘটে। দেৱীৰ এই ৰূপে ভক্তক গভীৰ চেতনা আৰু স্পষ্ট চিন্তা প্ৰদান কৰে।

*বিশুদ্ধ চক্ৰৰ জাগৰণ: যোগ সাধনাৰ ক্ষেত্ৰত এই দিনটোৰ বিশেষ মহত্ত্ব আছে. মা স্কন্দমাতা হৈছে বিশুদ্ধ চক্ৰৰ অধিপতি। এই দিনটোত সাধনা কৰিলে ভক্তৰ মন পবিত্ৰ হয়, আত্মবিশ্বাস বাঢ়ে আৰু বাক্য শক্তি বা বাৎসল্য গুণ সুদৃঢ় হয়।

* ভয় দূৰীকৰণ আৰু মোক্ষ লাভ: মা স্কন্দমাতাৰ এহাতে থকা অভয় মুদ্ৰাই ভক্তক সকলো ভয়ৰ পৰা মুক্ত কৰে। দেৱীৰ আৰাধনাই সংসাৰৰ সকলো দুখ-কষ্ট, মানসিক চাপ দূৰ কৰি শেষত মোক্ষ বা মুক্তিৰ পথ প্ৰশস্ত কৰে।

দেৱী স্কন্দমাতাৰ ধ্যান মন্ত্ৰ - সিংহাসনগতা নিত্যং পদ্দাশ্ৰিতকৰদ্বয়া।

তথ্য অনুসৰি, মা স্কন্দমাতাক সন্তুষ্ট কৰিবলৈ নৱৰাত্ৰিৰ পঞ্চম দিনা বিশেষভাৱে কল ভোগ হিচাপে অৰ্পণ কৰা হয়।

* পকা কল: মা স্কন্দমাতাৰ আটাইতকৈ প্ৰিয় ভোগ হৈছে পকা কল।

* কলৰ পৰা তৈয়াৰী মিঠাই: আপুনি কলৰ হালুৱা বা কলৰ ৰসগোল্লাও অৰ্পণ কৰিব পাৰে।

* মিঠাই আৰু ক্ষীৰ: ইয়াৰ উপৰিও গাখীৰেৰে তৈয়াৰী ক্ষীৰ বা বগা ৰঙৰ মিঠাইও দেৱীৰ চৰণত আগবঢ়াব পাৰি।

মা স্কন্দমাতাক কলৰ ভোগ অৰ্পণ কৰিলে ভক্তই উত্তম স্বাস্থ্য, সন্তান সুখ আৰু দীৰ্ঘায়ু লাভ কৰে বুলি বিশ্বাস কৰা হয়।