নিউজ ডেস্ক : মণিপুৰৰ নিষিদ্ধ সংগঠন পিপলছ ৰিভলিউশ্বনেৰী পাৰ্টী অৱ কাংগ্লেপাক (PREPAK) আৰু ইয়াৰ সশস্ত্ৰ শাখা ৰেড আৰ্মীয়ে ১২ নৱেম্বৰ শ্বহীদ দিৱস অৰ্থাৎ ‘আথৌবাছিংগী নিংশিং নুমিত’ (Athoubasinggi Ningsing Numit) পালন কৰিব। সংগঠনটোৱে আন্দোলনত প্ৰাণ হেৰুওৱা সকলৰ স্মৃতিত জনসাধাৰণক সকলো ধৰণৰ আমোদ-প্ৰমোদৰ কাৰ্যসূচী স্থগিত ৰাখিবল আৰু সন্ধিয়া বন্তি প্ৰজ্বলন কৰিবলৈ আহ্বান জনাইছে।
প্ৰেছ বিজ্ঞপ্তিযোগে PREPAK-ৰ প্ৰচাৰ আৰু প্ৰফেগেণ্ডাৰ চাৰ্জ ডি এফিয়াৰ্ছ লেইবাক ঙাকপা লুৱাঙে কয় যে এই বাৰ্ষিক অনুষ্ঠানে কাংগ্লেপাক (মণিপুৰ) মুক্তি আন্দোলনত প্ৰাণ আহুতি দিয়া ব্যক্তিসকলক স্মৰণ কৰে।
বিজ্ঞপ্তিখনৰ অনুসৰি, সংগঠনটোৰ ইতিহাসত ১২ নৱেম্বৰ তাৰিখটো দুটা গুৰুত্বপূৰ্ণ ঘটনাৰ সৈতে জড়িত। প্ৰথমটো আছিল ১৯৭৮ চনত লেইমাৰকত সংঘটিত হোৱা এক সংঘৰ্ষ, য’ত যুটীয়া নিৰাপত্তা বাহিনীৰ বিৰুদ্ধে যুঁজ দি PREPAK আৰু পিপলছ লিবাৰেচন আৰ্মী (PLA)-ৰ কেডাৰ নিহত হৈছিল। দ্বিতীয় ঘটনাটো আছিল ১৯৮৫ চনত কাবোৱাকচিং চেনী কলত PREPAK-ৰ নেতা তুলাচন্দ্ৰৰ হত্যাকাণ্ড।
সংগঠনটোৱে কেন্দ্ৰীয় চৰকাৰৰ সৈতে মণিপুৰৰ সম্পৰ্কক লৈ কেইবাটাও ৰাজনৈতিক আৰু ঐতিহাসিক দাবী উত্থাপন কৰে। তেওঁলোকে অভিযোগ কৰে যে ভাৰত চৰকাৰে জিম্মাত মৃত্যু (custodial deaths), জোৰকৈ অন্তৰ্ধান কৰা (enforced disappearances) আৰু সাম্প্ৰদায়িক বিভাজন গভীৰ কৰাৰ প্ৰয়াসকে ধৰি বিভিন্ন দমনমূলক ব্যৱস্থা অব্যাহত ৰাখিছে।
বিজ্ঞপ্তিটোত ১৯৪৯ চনৰ ১৫ অক্টোবৰ তাৰিখটোক মণিপুৰক বলপূৰ্বকভাৱে ভাৰতভুক্ত কৰাৰ দিন বুলি বৰ্ণনা কৰা হৈছে আৰু যুক্তি দিয়া হৈছে যে ইয়াৰ পিছত অঞ্চলটোৰ সাৰ্বভৌমত্ব ধূলিসাৎ কৰা হৈছিল। ইয়াত কোৱা হৈছে যে ১৯৭২ চনত পূৰ্ণাংগ ৰাজ্যৰ মৰ্যাদা লাভ কৰাৰ পূৰ্বে এই ভূখণ্ডক ‘পাৰ্ট চি’ (Part C) প্ৰদেশলৈ অৱনমিত কৰা হৈছিল।
মন্তব্য (0)
লগইন কৰি মন্তব্য লিখক।