ত্ৰিপুৰাৰ যুৱকক বৰ্ণবাদী অপমানৰ গোচৰত ইনফ্লুৱেঞ্চাৰ আমিৰ শ্বৌকিনক এদিনৰ আৰক্ষীৰ জিম্মালৈ প্ৰেৰণ

নিউজ ডেস্ক : বৰ্ণবাদী অপমানৰ গোচৰত গ্ৰেপ্তাৰ হোৱা কণ্টেণ্ট ক্ৰিয়েটৰ আমিৰ শ্বৌকিনক শুক্ৰবাৰে দিল্লীৰ তিছ হাজাৰী আদালতে এদিনৰ ন্যায়িক জিম্মালৈ প্ৰেৰণ কৰে। ত্ৰিপুৰাৰ এগৰাকী যুৱকক বৰ্ণবাদী মন্তব্যৰে অপমান আৰু হেয় প্ৰতিপন্ন কৰাৰ অভিযোগ উত্থাপন হৈছে শ্বৌকিনৰ বিৰুদ্ধে। অভিযোগ অনুসৰি, ঘটনাটোৰ এটা ভিডিঅ’ও ছ’চিয়েল মিডিয়াত ভাইৰেল হৈ পৰে, যাৰ ফলত ব্যাপক প্ৰতিক্ৰিয়াৰ সৃষ্টি হয়।

উল্লেখ্য যে, বৃহস্পতিবাৰ‍ অৰ্থাৎ ২২ অক্টোবৰ তাৰিখে দিল্লী আৰক্ষীয়ে এই ভিডিঅ’টোক স্বতঃপ্ৰণোদিতভাৱে বিবেচনালৈ লৈ গোচৰ ৰুজু কৰাৰ পিছত শ্বৌকিনক গ্ৰেপ্তাৰ কৰে।

তথ্য অনুসৰি, উত্তৰ-পূব অঞ্চলৰ বিশেষ আৰক্ষী গোটৰ পৰা যোগাযোগ লাভ কৰাৰ পিছত দিল্লী আৰক্ষীৰ চোৰাংচোৱা তথ্য সংকলন আৰু কৌশলগত অভিযান শাখা (IFSO)-ই ভিডিঅ’টোৰ তদন্ত কৰি আছে।

এই ঘটনাটোৱে ব্যাপক নিন্দাৰ সৃষ্টি কৰিছে। কেন্দ্ৰীয় সংসদীয় পৰিক্ৰমা মন্ত্ৰী কিৰেন ৰিজিজু আৰু ত্ৰিপুৰাৰ মুখ্যমন্ত্ৰী মানিক সাহাই এই ঘটনাৰ সৈতে জড়িত লোকসকলৰ বিৰুদ্ধে ব্যৱস্থা গ্ৰহণৰ দাবী জনাইছে।

য’ত সাহাই ত্ৰিপুৰাৰ আৰক্ষী সঞ্চালক প্ৰধানক (DGP) এই বিষয়ত দিল্লী আৰক্ষীৰ সৈতে সমন্বয় ৰক্ষা কৰিবলৈ নিৰ্দেশ দিয়ে, আনহাতে ৰিজিজুৱে ‘এক্স’যোগে কয় যে, শ্বৌকিনৰ বিৰুদ্ধে ব্যৱস্থা গ্ৰহণ কৰা হ’ব আৰু দিল্লী তথা ত্ৰিপুৰা আৰক্ষীয়ে তেওঁক “কঠোৰ শিক্ষা” দিব।

ত্ৰিপুৰা ষ্টুডেণ্টছ ফ’ৰাম দিল্লীয়ে (TSFD) দিল্লী আৰক্ষীৰ উত্তৰ-পূব মণ্ডলৰ বিশেষ আৰক্ষী গোট (SPUNER)-ৰ যুটীয়া আৰক্ষী আয়ুক্তক দাখিল কৰা অভিযোগত ভিডিঅ’টোৰ নিৰপেক্ষ তদন্তৰ দাবী জনাইছে। অভিযোগত কোৱা হৈছে যে, ভিডিঅ’টোত ত্ৰিপুৰাৰ এজন যুৱকক বৰ্ণবৈষম্যমূলক গালি-গালাজ কৰাৰ লগতে অপমানজনক ব্যৱহাৰ কৰা দেখা গৈছে।

শেহতীয়াকৈ ফ’ৰামটোৱে মূল ভিডিঅ’ ৰেকৰ্ডিং, মেটাডাটা, একাউণ্টৰ বিৱৰণ আৰু আপলোডৰ ইতিহাসকে ধৰি সকলো ইলেক্ট্ৰনিক প্ৰমাণ সংৰক্ষণ কৰিবলৈও দাবী জনায় আৰু আৰক্ষীক উপযুক্ত আইনী ব্যৱস্থা গ্ৰহণ কৰিবলৈ আহ্বান জনায়।

আৰক্ষীৰ সূত্ৰ অনুসৰি, ভিডিঅ’টো প্ৰায় এমাহ পূৰ্বে আহমেদাবাদত ৰেকৰ্ড কৰা বুলি অভিযোগ উত্থাপন হৈছে আৰু ঘটনাটোৰ সৈতে জড়িত সাতৰ পৰা আঠজন লোকৰ ভূমিকা সন্দৰ্ভত তদন্ত চলি আছে।