ভাৰতত নিৰ্মাণ হ’ব ৮খন অত্যাধুনি যুদ্ধ জাহাজ, চুক্তি সম্পন্ন

নিউজ ডেস্ক : প্ৰতিৰক্ষা মন্ত্ৰণালয়ে সোমবাৰে ভাৰতীয় নৌসেনাৰ বাবে আঠখন নেক্সট জেনেৰেচন কৰভেট (NGC) নিৰ্মাণৰ বাবে গাৰ্ডেন ৰীচ শ্বিপবিল্ডাৰ্ছ এণ্ড ইঞ্জিনিয়াৰ্ছ লিমিটেড (GRSE) আৰু গোৱা শ্বিপয়াৰ্ড লিমিটেড (GSL)ৰ সৈতে ৫৩,৮৬৬.৫০ কোটি টকাৰ চুক্তি স্বাক্ষৰ কৰে। প্ৰতিৰক্ষা সচিব ৰাজেশ কুমাৰ সিঙৰ উপস্থিতিত এই চুক্তি স্বাক্ষৰিত হয়। এই চুক্তি অনুসৰি কলকাতাৰ GRSE-এ পাঁচখন কৰভেট নিৰ্মাণ কৰিব, আনহাতে GSL-এ বাকী থকা তিনিখন জাহাজ নিৰ্মাণ কৰিব।

এই প্ৰকল্পই ভাৰতৰ থলুৱা যুদ্ধজাহাজৰ ডিজাইন আৰু নিৰ্মাণ ক্ষমতা শক্তিশালী কৰাৰ ক্ষেত্ৰত এক গুৰুত্বপূৰ্ণ পদক্ষেপ চিহ্নিত কৰিছে। প্ৰতিৰক্ষা মন্ত্ৰণালয়ৰ মতে, এইটোৱেই প্ৰথম প্ৰকল্প য’ত জাহাজসমূহ ভাৰতীয় নৌসেনাৰ দ্বাৰা থলুৱাভাৱে ডিজাইন কৰা হ’ব আৰু এক প্ৰতিযোগিতামূলক বিডিং প্ৰক্ৰিয়াৰ জৰিয়তে নিৰ্বাচিত প্ৰতিৰক্ষা ৰাজহুৱা খণ্ডৰ প্ৰতিষ্ঠানসমূহ (DPSU)ৰ দ্বাৰা নিৰ্মাণ কৰা হ’ব।

পৰৱৰ্তী প্ৰজন্মৰ কৰভেটসমূহ উন্নত মিছাইল, অস্ত্ৰ প্ৰণালী আৰু চেন্সৰ চুইটেৰে সজ্জিত হ’ব, যাৰ ফলত আকাশমাৰ্গ, উপৰিভাগ (surface) আৰু উপ-পৃষ্ঠ (sub-surface) ডমেইনত অভিযান চলাবলৈ সক্ষম হ’ব। এইবোৰৰ অন্তৰ্ভুক্তিয়ে ভাৰতীয় নৌসেনাৰ কাৰ্যক্ষম ক্ষমতা লক্ষণীয়ভাৱে বৃদ্ধি কৰিব বুলি আশা কৰা হৈছে, বিশেষকৈ সামুদ্ৰিক বাণিজ্য পথ সুৰক্ষিত কৰা, উপৰিভাগ আৰু ছাবমেৰিন বিৰোধী যুদ্ধ অভিযান চলোৱা, উপকূলীয় প্ৰতিৰক্ষা শক্তিশালী কৰা আৰু লিটোৰেল (littoral) যুদ্ধ অভিযানত সহায় কৰিব।

ভাৰতৰ সামুদ্ৰিক স্বাৰ্থ নিৰীক্ষণ আৰু সুৰক্ষিত কৰাৰ ক্ষমতা বৃদ্ধি কৰি সামুদ্ৰিক নিৰীক্ষণ আৰু উপস্থিতি অভিযানৰ বাবেও এই জাহাজসমূহ মোতায়েন কৰা হ’ব।

প্ৰতিৰক্ষা মন্ত্ৰালয়ৰ মতে, অহা ১০ বছৰত জাহাজ নিৰ্মাণ কাৰখানাত আঠখন কৰভেট নিৰ্মাণৰ ফলত আনুমানিক ৭২ লাখ পাৰ্চন-ডেইজ (person-days) কৰ্মসংস্থাপন সৃষ্টি হ’ব বুলি আশা কৰা হৈছে। ইয়াৰ উপৰিও একে সময়ছোৱাতে আনুষংগিক উদ্যোগ আৰু MSME সমূহত প্ৰায় ৪৬০ লাখ পাৰ্চন-ডেইজ কৰ্মসংস্থাপন সৃষ্টি হোৱাৰ সম্ভাৱনা আছে।

প্ৰতিৰক্ষা উৎপাদনত স্বাৱলম্বী হোৱা আৰু গুৰুত্বপূৰ্ণ সামৰিক প্লেটফৰ্ম আৰু সঁজুলিৰ বাবে বিদেশী যোগানকাৰীৰ ওপৰত নিৰ্ভৰশীলতা হ্ৰাস কৰাৰ বাবে ভাৰতৰ ব্যাপক প্ৰচেষ্টাৰ এক অংশ হৈছে এই প্ৰকল্প।