নেপালত আকৌ ভয়ংকৰ বান, নিমিষতে উটুৱাই নিলে ৭টাকৈ ঘৰ

নেপাল আৰ্মীয়ে জাৰি কৰা তথ্য মতে, হঠাতে বোকাময় পানীৰ ধল পাহাৰৰ পৰা বৈ আহিছে । যাৰ বাবে বুধী গণ্ডকী নদীৰ চুবানুমৱী গ্ৰাম্য পৌৰসভা-৬ৰ এলেকাত বৃহৎ বান অহা দেখা পোৱা গৈছে বুলি নেপাল আৰ্মীয়ে এক্স যোগে উল্লেখ কৰিছে ।

গতিকে বানপানী পাৰ হৈ নোযোৱালৈকে ত্ৰিশূলী আৰু দোভান নদীৰ পাৰলৈ নাযাব সতৰ্কতা জাৰি কৰিছে প্ৰাশাসনে । বিপৰীতে নদীৰ পাৰত বসবাস কৰা লোকক ওখ স্থানত আশ্ৰয় লবলৈ আহ্বান জনাইছে ।

দেশখৰ গোৰখাৰ মুখ্য জিলা বিষয়া ধৰ্মেন্দ্ৰ কুমাৰ মিশ্ৰই উল্লেখ কৰা অনুসৰি, "চুবনুব্ৰী গ্ৰাম্য পৌৰসভাৰ চিউৰিবাছত ভূমিস্খলন সংঘটিত হৈছে । যাৰ বাবে জগত নদীৰ পাৰত থকা পাঁচৰ পৰা সাতটা ঘৰ উটুৱাই লৈ গৈছে । নদীৰ নামনি অংশতো আন কেইটামান ঘৰ উটুৱাই লৈ যোৱাৰ খবৰ পোৱা গৈছে ।"

জিলাখনৰ স্থানীয় বিষয়াসকলৰ মতে, "দেওবাৰে পুৱাই নদীৰ পানী তীব্ৰভাৱে বৃদ্ধি পাইছিল আৰু নদীৰ প্ৰবল শব্দ শুনা গৈছিল । উগিলুং আৰু চিয়াৰ জানৰ পানীও ওফন্দি উঠে ।"