উত্তৰাখণ্ড নাগৰিক বিমান পৰিবহন উন্নয়ন প্ৰাধিকৰণে এক বিবৃতিত কয়, "বদৰীনাথৰ পৰা ডেৰাডুনৰ সহস্ৰধাৰালৈ চলাচল কৰা আৰু প্ৰায় ১৩:১৪ বজাত উৰা মৰা ট্ৰান্স ভাৰত এভিয়েশ্যন প্ৰাইভেট লিমিটেডৰ VT-HCX কল চাইন থকা হেলিকপ্টাৰখন সন্ধানহীন হোৱাৰ খবৰ পোৱা গৈছে । যোশীমঠ উপত্যকাৰ ওপৰেৰে উৰি থকা অৱস্থাত হেলিকপ্টাৰখনে যোগাযোগ হেৰুৱাই পেলায়। একে সময়তে ট্ৰেকিং চিষ্টেমেও হেলিকপ্টাৰখন ট্ৰেক কৰিব নোৱাৰা হয় আৰু বৰ্তমান ইয়াৰ অৱস্থান এতিয়াও নিশ্চিত কৰিব পৰা হোৱা নাই।"
বিবৃতিত লগতে কোৱা হৈছে যে সাৱধানতামূলক ব্যৱস্থা হিচাপে মেচাৰ্ছ ট্ৰান্স ভাৰত এভিয়েশ্যন প্ৰাইভেট লিমিটেডৰ সমগ্ৰ বিমান বহৰটোৰ উৰণ বন্ধ কৰি দিয়া হৈছে । সন্ধান আৰু উদ্ধাৰ অভিযানৰ বাবে ৰাজ্যিক উদ্ধাৰকাৰী দল আৰু সেনাক মোতায়েন কৰা হৈছে। আটাইকেইজন যাত্ৰীয়েই পুৰুষ আছিল ৷ তেওঁলোক আছিল প্ৰতাপ, অৰুণ, শংকৰ গৌড়া, সুধীৰ কে, এইচ এছ নটৰাজ আৰু পাইলট কেপ্তেইন হিমাংশু ।
মুখ্যমন্ত্ৰী পুষ্কৰ ধামীয়ে এক্সত (X) এটা পোষ্টত লিখিছে, "যোশীমঠৰ ওচৰৰ ছায়ী গাঁৱৰ সমীপত এখন হেলিকপ্টাৰ দুৰ্ঘটনাগ্ৰস্ত হোৱাৰ দুৰ্ভাগ্যজনক খবৰ আমি লাভ কৰিছোঁ। জিলা প্ৰশাসন, দুৰ্যোগ প্ৰশমন বিভাগ আৰু এছ ডি আৰ এফৰ দ্বাৰা এটা যুটীয়া উদ্ধাৰ অভিযান চলোৱা হৈছে।"
মুখ্যমন্ত্ৰীগৰাকীয়ে লগতে কয়, "মই নিজেও সমগ্ৰ ঘটনাটো নিৰন্তৰ নিৰীক্ষণ কৰি আছোঁ। গুৰুতৰভাৱে আঘাতপ্ৰাপ্তসকলক উন্নত চিকিৎসাৰ বাবে লগে লগে উচ্চ চিকিৎসা কেন্দ্ৰলৈ এয়াৰলিফট কৰিবলৈ নিৰ্দেশ দিয়া হৈছে। মই ভগৱানৰ ওচৰত যাত্ৰীসকলৰ সুৰক্ষিত প্ৰত্যাৱৰ্তনৰ বাবে প্ৰাৰ্থনা জনাইছোঁ।"
এগৰাকী ৰাজ্যিক বিষয়ায়ো "দুৰ্ঘটনা এটা ঘটিছে" বুলি কয়। যোশীমঠৰ মহকুমাধিপতি (SDM) চন্দ্ৰ শেখৰ বশিষ্ঠই কয়, "হয়, এখন দুৰ্ঘটনা ঘটাটো সম্ভৱ। সেনা, আমাৰ এছ ডি আৰ এফ দল, আৰক্ষী দল আৰু আমাৰ স্বাস্থ্য বিভাগৰ দলটো দুৰ্ঘটনাস্থলীত উপস্থিত হৈছে। ময়ো ঘটনাস্থলীলৈ গৈ আছোঁ।"
যোৱা এক দশকত উত্তৰাখণ্ডত অতি কমেও ১২ টা পৃথক হেলিকপ্টাৰ ঘটনা নথিভুক্ত কৰা হৈছে – যাৰ ভিতৰত পাঁচটা ডাঙৰ মাৰাত্মক দুৰ্ঘটনা আৰু সাতটা অনা-মাৰাত্মক ঘটনা ৷
মন্তব্য (0)
লগইন কৰি মন্তব্য লিখক।