প্ৰধানমন্ত্ৰী মোদী, গৃহমন্ত্ৰী শ্বাহক মুকলি বিতৰ্কৰ বাবে পুনৰ প্ৰত্যাহ্বান ৰাহুলৰ

নিউজ ডেস্ক: প্ৰধানমন্ত্ৰী নৰেন্দ্ৰ মোদীক মুকলি তৰ্কৰ বাবে পুনৰ প্ৰত্যাহ্বান কংগ্ৰেছ নেতা ৰাহুল গান্ধীৰ । মঙলবাৰে লোকসভাৰ বিৰোধী দলৰ নেতা গান্ধীয়ে দেশৰ বিত্তীয় ব্যৱস্থা আৰু বিদেশী প্ৰভাৱৰ অভিযোগ আদিকে ধৰি বিভিন্ন বিষয়ত মুকলি বিতৰ্কৰ বাবে প্ৰধানমন্ত্ৰী মোদী, গৃহমন্ত্ৰী অমিত শ্বাহক পুনৰ প্ৰত্যাহ্বান জনায় ।

গান্ধীয়ে প্ৰধানমন্ত্ৰী মোদীক মুকলি তৰ্কৰ বাবে যিকোনো স্থান বাচি ল’বলৈ কয়। তেওঁৰ এই আহ্বানৰ কিছু সময়ৰ পিছতে কেন্দ্ৰীয় গৃহমন্ত্ৰী অমিত শ্বাহে পুনৰ কয় যে চৰকাৰে সংসদত প্ৰতিটো বিষয়তে আলোচনা কৰিবলৈ সাজু আৰু তেওঁ কংগ্ৰেছ নেতাজনক ইয়াত অংশগ্ৰহণ কৰিবলৈ প্ৰত্যাহ্বান জনায় ।

এক্সত ৰাহুল গান্ধীয়ে কয় যে এই তৰ্ক সংবাদ মাধ্যম আৰু যুৱ প্ৰজন্মৰ উপস্থিতিত হোৱা উচিত। তেওঁ লগতে পৰামৰ্শ দিয়ে যে মোদীয়ে পচন্দ কৰা যিকোনো ব্যক্তি, আনকি ৰাষ্ট্ৰীয় স্বয়ংসেৱক সংঘৰ (RSS) মুৰব্বী মোহন ভাগৱতেও এই আলোচনাৰ সঞ্চালনা কৰিব পাৰে।

গান্ধীয়ে কয়, "২৪ ঘণ্টা পাৰ হৈ গ’ল, মোদী জী। মই আপোনাক প্ৰত্যাহ্বান জনাইছো । আপুনি কয় যে বিৰোধী দল দেশদ্ৰোহী। যিকোনো মঞ্চ, যিকোনো স্থান বাচি লওক আৰু মোৰ সৈতে তৰ্ক কৰক । কোন দেশদ্ৰোহী ? কাৰ বিদেশী শক্তিৰ সৈতে সম্পৰ্ক আছে আৰু সেইবোৰ কেনেকুৱা সম্পৰ্ক ওলাই পৰিব ? ইয়াক যিমান পাৰি সোনকালে কৰক। ভয় নকৰিব ।"

গান্ধীয়ে কয় যে এই আলোচনাত দেশৰ বিত্তীয় ব্যৱস্থা আৰু বিত্তীয় গাঁথনি অন্তৰ্ভুক্ত হ’ব লাগে । আমেৰিকাৰ চুক্তিখন কেনেকৈ আলোচনা কৰা হৈছিল, ইয়াক কিয় ইমান খৰখেদাকৈ চূড়ান্ত কৰা হৈছিল আৰু কেবিনেটক কিয় এই সন্দৰ্ভত অৱগত কৰা হোৱা নাছিল বুলিও তেওঁ প্ৰশ্ন উত্থাপন কৰে ।

"আপুনি অকলে কিয় এই সিদ্ধান্ত ল’লে? কেবিনেটক কিয় জনোৱা হোৱা নাছিল? (গৌতম) আদানীৰ গোচৰটো কিয় বন্ধ কৰা হ’ল? (জেফ্ৰী) ইপষ্টেইনৰ কি হ’ল?" গান্ধীয়ে প্ৰশ্ন কৰে। কংগ্ৰেছ নেতাজনে তেওঁৰ বিৰুদ্ধে ৰুজু হোৱা মানহানিৰ গোচৰসমূহৰ প্ৰসংগও উল্লেখ কৰি দাবী কৰে যে তেওঁ এনে প্ৰায় ৪৫ টা গোচৰৰ সন্মুখীন হৈছে। তেওঁ কয় যে বিদেশী সম্পৰ্ক সন্দৰ্ভত তেওঁ কৰা মন্তব্যক লৈ কোনো মানহানিৰ গোচৰ ৰুজু কৰা হোৱা নাই আৰু তেওঁ প্ৰধানমন্ত্ৰীক ইচ্ছা কৰিলে আইনী ব্যৱস্থা ল’বলৈ আমন্ত্ৰণ জনায়।