নেপালত ১০ জন সন্ধানহীন, ১৫০ তকৈও অধিক বিদেশী পৰ্যটক আৱদ্ধ

আগতীয়া দিয়া সতৰ্কবাণীৰ বাবে অঞ্চলটোৰ ৰাইজ ওখ ঠাইলৈ যাবলৈ সক্ষম হয় । বৰ্তমানলৈ সেনাই ৪৯ জন লোকক উদ্ধাৰ কৰিছে লগতে কৰ্তৃপক্ষই অঞ্চলসমূহ খালী কৰাৰ নিৰ্দেশ দিছে আৰু নামনিৰ জিলাসমূহক সতৰ্ক কৰি দিছে ।

উল্লেখ্য যে, ভোটো কোশী-ত্ৰিশূলী নদীৰ ভয়াৱহ বানত ১,৪৫০ জনতকৈও অধিক লোকৰ মৃত্যু হোৱা আৰু ৫,২৫০ জন লোক সন্ধানহীন হোৱাৰ মাত্ৰ ৪৫ দিনৰ পিছতে এই দুৰ্যোগ সংঘটিত হৈছে । কাঠমাণ্ডুৰ পৰা প্ৰায় ১০০ কিলোমিটাৰ পশ্চিমে অৱস্থিত ত্ৰিশূলীৰ উপনৈ বুঢ়ী গণ্ডকীত দেওবাৰে পুৱা প্ৰায় ৪ বজাত এই বান হৈছিল । দেওবাৰে হোৱা বানৰ বাবে প্ৰায় ১০০ গৰাকীৰো অধিক বিদেশী লোক অঞ্চলটোত আবদ্ধ হৈ আছে বুলি জানিব পৰা গৈছে ।

কৰ্তৃপক্ষই সন্দেহ কৰিছে যে ভূমিস্খলনৰ ফলত সাময়িকভাৱে এখন উপনৈ বন্ধ হৈ পৰিছিল । অৱশ্যে, বিষয়াসকলে এতিয়াও ইয়াৰ সঠিক কাৰণ নিশ্চিত কৰিব পৰা নাই । ইফালে উনগিলুং নদীৰ ওচৰত থকা দুগৰাকী মহিলা আৰু তিনিজন পুৰুষসহ পাঁচজন লোক বৰ্তমান সন্ধানহীন হৈ আছে। ইয়াৰ উপৰিও ৪ ৰ পৰা ৫ জন পশুপালকৰ সৈতেও যোগাযোগ বিচ্ছিন্ন হৈছে ।

বানপানীয়ে চাল্লেৰীত নিৰ্মীয়মাণ ৩৪১ মেগাৱাটৰ বুঢ়ী গণ্ডকী জলবিদ্যুৎ প্ৰকল্পৰ নিৰ্মাণ শিবিৰ আৰু সঁজুলিসমূহো ধ্বংস কৰে । আৰুগাটত, বুঢ়ী গণ্ডকী নদীৰ পানীৰ স্তৰ বিপদসীমা ৫ মিটাৰৰ বিপৰীতে ৮.৪ মিটাৰলৈ বৃদ্ধি পায় ।

ধাদিঙ, তনহু, চিতৱন আৰু পূব তথা পশ্চিম নাৱালপৰাচীত কৰ্তৃপক্ষই স্থান খালী কৰাৰ সতৰ্কবাণী জাৰি কৰিছে আৰু ত্ৰিশূলী তথা নাৰায়ণী নদীৰ পাৰৰ বাসিন্দাসকলক নদীৰ পাৰৰ পৰা আঁতৰি থাকিবলৈ সাৱধান কৰি দিছে ।