ভিছা আবেদন প্ৰক্ৰিয়াত এক ডাঙৰ পৰিৱৰ্তন

আপুনি সোনকালেই চীন দেশলৈ ভ্ৰমণৰ পৰিকল্পনা কৰিছে নেকি? তেন্তে বিমানৰ টিকট, হোটেল আৰু ভ্ৰমণসূচী বুকিং কৰাৰ আগতে এটা নতুন ভিছা প্ৰক্ৰিয়াৰ বিষয়ে জনাটো জৰুৰী। চীন দেশে ভাৰতত ভিছা আবেদন জমা দিয়াৰ নিয়ম সলনি কৰিবলৈ প্ৰচেষ্টা চলাইছে। অহা ২৬ অক্টোবৰৰ পৰা বিদ্যমান ভিছা আবেদন কেন্দ্ৰসমূহৰ পৰিৱৰ্তে পোনপটীয়াকৈ নিজৰ কূটনৈতিক মিছনসমূহৰ জৰিয়তে এই ভিছা প্ৰক্ৰিয়া পৰিচালনা কৰা হ’ব।

তথ্য অনুসৰি, নতুন দিল্লীস্থিত চীনৰ দূতাবাস আৰু মুম্বাইস্থিত চীনৰ মহা-বাণিজ্যদূত কাৰ্যালয়ে ২৬ অক্টোবৰৰ পৰা চীনৰ ভিছা আৰু কনছুলাৰ লিগলাইজেচন আবেদনসমূহ পোনে পোনে গ্ৰহণ কৰিব। নতুন দিল্লী, মুম্বাই আৰু কলকাতাত থকা বৰ্তমানৰ চীনা ভিছা আবেদন কেন্দ্ৰসমূহে একেদিনাৰ পৰাই নতুন আবেদন গ্ৰহণ কৰা বন্ধ কৰিব।

যিসকল আবেদনকাৰীৰ নথিপত্ৰ ইতিমধ্যে এই কেন্দ্ৰসমূহত প্ৰক্ৰিয়াকৰণ কৰা হৈছে, তেওঁলোকে ৩০ অক্টোবৰৰ দুপৰীয়া ১২ বজালৈকে সেইবোৰ সংগ্ৰহ কৰিব পাৰিব।

নতুন ব্যৱস্থাৰ অধীনত, এই প্ৰক্ৰিয়াটো অনলাইনযোগে আৰম্ভ হয়। যাত্ৰীসকলে চীনৰ বৈদেশিক পৰিক্ৰমা মন্ত্ৰালয়ৰ কনচুলৰ প’ৰ্টেলত আবেদন পত্ৰ পূৰণ কৰিব লাগিব আৰু প্ৰয়োজনীয় নথিপত্ৰসমূহ আপলোড কৰিব লাগিব। এই পৰ্যায়ত কোনো ধৰণৰ মাছুল লোৱা নহয় ।

অনলাইন পৰীক্ষণ প্ৰক্ৰিয়া সম্পূৰ্ণ হোৱাৰ পিছত, আবেদনকাৰীসকলে এটা ইমেইল জাননী লাভ কৰিব। ইয়াৰ পিছত নিৰ্ধাৰিত মিছনত ব্যক্তিগতভাৱে নিজৰ পাছপ’ৰ্ট, আবেদন পত্ৰ আৰু নথিপত্ৰসমূহ জমা দিবলৈ তেওঁলোকৰ হাতত ৩০ দিন সময় থাকিব।

মহাৰাষ্ট্ৰ আৰু কৰ্ণাটকত বসবাস কৰা সকলে মুম্বাইত থকা চীনৰ কনছুলেট জেনেৰেলত নিজৰ আবেদন পত্ৰ দাখিল কৰিব লাগিব।

পশ্চিমবংগ, বিহাৰ, ঝাৰখণ্ড, উৰিষ্যা আৰু ছত্তীশগড়ৰ আবেদনকাৰীসকলৰ বাবে, নতুন দিল্লীস্থিত চীনা দূতাৱাসে পূৰ্বতে কলকাতা কনছুলাৰ অধিকাৰক্ষেত্ৰৰ অধীনত থকা আবেদনসমূহ সাময়িকভাৱে পৰিচালনা কৰিব। ভাৰতৰ অন্যান্য প্ৰান্তৰ আবেদনকাৰীসকলেও তেওঁলোকৰ আবেদন নতুন দিল্লীৰ দূতাৱাসতে জমা দিব লাগিব।

প্ৰথম পদক্ষেপটো অনলাইন হৈয়েই আছে। আবেদনকাৰীসকলে চীনৰ বৈদেশিক পৰিক্ৰমা মন্ত্ৰালয়ৰ ভিছা পৰ্টেলৰ জৰিয়তে অনলাইন পৰ্যালোচনাৰ বাবে ভিছা প্ৰ-পত্ৰ পূৰণ কৰিব লাগিব, প্ৰয়োজনীয় নথিপত্ৰ আপলোড কৰিব লাগিব আৰু আবেদন পত্ৰ দাখিল কৰিব লাগিব।

আবেদনপত্ৰখনে প্ৰাথমিক অনুমোদন পোৱাৰ পিছত, আবেদনকাৰীসকলক ইমেইলৰ জৰিয়তে অৱগত কৰা হ'ব। ইয়াৰ পিছত তেওঁলোকে নিজৰ পাছপৰ্ট, আবেদনপত্ৰ আৰু প্ৰয়োজনীয় সহায়ক নথিপত্ৰসমূহ লৈ নিৰ্ধাৰিত দূতাবাস বা কনছুলেটলৈ যাবলৈ ৩০ দিন সময় পাব। যিবোৰ ক্ষেত্ৰত প্ৰযোজ্য হয়, তাত আঙুলিৰ চাপ সংগ্ৰহ কৰা হ'ব ।

ভাৰতীয় পাছপৰ্ট ধাৰীসকলৰ বাবে সংশোধিত ভিছা মাছুলৰ গাঁথনি অনুসৰি একক প্ৰৱেশ (single-entry) ভিছাৰ বাবে ২,৯০০ টকা, দুমুখীয়া প্ৰৱেশ (double-entry) ভিছাৰ বাবে ৪,৪০০ টকা, ছয় মহীয়া বহু-প্ৰৱেশ (six-month multiple-entry) ভিছাৰ বাবে ৫,৯০০ টকা আৰু ১২ মাহ বা তাতকৈ অধিক সময়ৰ বাবে বৈধ বহু-প্ৰৱেশ (multiple-entry) ভিছাৰ বাবে ৮,৮০০ টকা নিৰ্ধাৰণ কৰা হৈছে। চীন চৰকাৰে ভাৰতৰ পৰা ভিছা আবেদন প্ৰক্ৰিয়াত কৰা নতুন পৰিৱৰ্তনৰ অংশ হিচাপে এই সংশোধিত মাছুল তালিকা প্ৰকাশ পাইছে।

শেহতীয়াকৈ ভ্ৰমণকাৰীসকলে এইটোও মন কৰা উচিত যে, দূতাৱাস আৰু মুম্বাইৰ কনছুলেটত সাময়িকভাৱে কেৱল ডিমাণ্ড ড্ৰাফ্টৰ জৰিয়তেহে মাছুল গ্ৰহণ কৰা হ’ব। উল্লেখ্য যে, আবেদন কৰাৰ পূৰ্বে চীনৰ দূতাবাসে আবেদনকাৰীসকলক শ্ৰেণী-নিৰ্দিষ্ট দস্তাবেজ আৰু প্ৰক্ৰিয়াগত উন্নীতকৰণৰ বাবে ইয়াৰ শেহতীয়া ভিছা জাননীসমূহ পৰীক্ষা কৰিবলৈ পৰামৰ্শ প্ৰদান কৰিছে।