Friday, 20 November 2026
লগইন
ব্ৰেকিং

বনাঞ্চল সুৰক্ষা, হাতী-মানুহৰ সংঘাত হ্ৰাসৰ বাবে উচ্ছেদ চলিব : মুখ্যমন্ত্ৰী

বেদখলকাৰীৰ বিৰুদ্ধে উচ্ছেদ অব্যাহত থাকিব

নিউজ ডেস্ক : সোমবাৰে মুখ্যমন্ত্ৰী হিমন্ত বিশ্ব শৰ্মাই স্পষ্ট কৰি দিয়ে যে বনাঞ্চল সুৰক্ষিত কৰা আৰু হাতী-মানুহৰ সংঘাত হ্ৰাস কৰাৰ স্বাৰ্থত প্ৰয়োজন অনুসৰি ৰাজ্যত উচ্ছেদ অভিযান অব্যাহত থাকিব। অৱশ্যে এই উচ্ছেদ অভিযান কোনো নিৰ্দিষ্ট ধৰ্মৰ লোকক লক্ষ্য কৰি চলোৱা হোৱা নাই বুলিও মন্তব্য কৰে মুখ্যমন্ত্ৰীগৰাকীয়ে।

নগাঁও জিলাৰ উপ-নিৰ্বাচনত বিজেপিক সমৰ্থন জনোৱা ভোটাৰসকলক ধন্যবাদ জনোৱাৰ উদ্দেশ্যে লাহৰীঘাটত অনুষ্ঠিত এখন ৰাজহুৱা সভাৰ পাছতে সংবাদ মাধ্যমৰ আগত এই মন্তব্য কৰে মুখ্যমন্ত্ৰীগৰাকীয়ে।

তেওঁ কয়, "য'তেই প্ৰয়োজন হ'ব, তাতেই উচ্ছেদ চলোৱা হ'ব। কিন্তু এই অভিযান কোনো নিৰ্দিষ্ট ধৰ্মৰ বিৰুদ্ধে নহয়।"

মুখ্যমন্ত্ৰীগৰাকীয়ে লগতে কয় যে প্ৰকৃত ভূমিহীন লোকসকলে বসুন্ধৰা আঁচনিৰ অধীনত ভূমিৰ বাবে আবেদন কৰিব পাৰিব। অৱশ্যে নিজৰ অঞ্চলতে ভূমিৰ ব্যৱস্থা কৰিবলৈ চেষ্টা কৰিব লাগে, আন অঞ্চললৈ গৈ ভূমি বেদখল কৰা উচিত নহয় বুলি মন্তব্য কৰে তেওঁ।

এই সন্দৰ্ভত মুখ্যমন্ত্ৰীয়ে কয়, "মোৰ চিন্তা হৈছে, যদি এজন ব্যক্তি ধিঙৰ হয়, তেন্তে তেওঁ ধিঙতে মাটি লাভ কৰিব পাৰিব লাগে। তাৰ বাবে গোলাঘাট বা আন কোনো ঠাইলৈ যাবলগীয়া হ'ব নালাগে। যদি হোজাইৰ কোনো ব্যক্তি ডিব্ৰুগড়লৈ গৈ মাটি বেদখল কৰে, তেন্তে তাৰ প্ৰতিক্ৰিয়া সৃষ্টি হ'ব।"

ইফালে, নিৰ্বাচনী প্ৰচাৰৰ সময়ত লাহৰীঘাটবাসীক দিয়া উন্নয়নমূলক প্ৰতিশ্ৰুতিসমূহ চৰকাৰে ৰূপায়ণ কৰিব বুলি উল্লেখ কৰি মুখ্যমন্ত্ৰীগৰাকীয়ে কয় যে প্ৰতিশ্ৰুতি অনুসৰি কাম কৰাৰ লগতে ইয়াৰ বাহিৰেও অধিক উন্নয়নমূলক কাম কৰা হ'ব।

লাহৰীঘাটত প্ৰস্তাৱিত দলং নিৰ্মাণ সন্দৰ্ভত তেওঁ কয় যে এই প্ৰকল্পৰ বাবে প্ৰায় ৪,০০০ কোটি টকাৰ বিনিয়োগৰ প্ৰয়োজন হ'ব।

"মই এই বিষয়ত কাম কৰি আছোঁ," বুলি উল্লেখ কৰি মুখ্যমন্ত্ৰীগৰাকীয়ে ইতিমধ্যে নিৰ্মাণকাৰ্য চলি থকা কেইবাখনো দলঙৰ কথা উল্লেখ কৰে। ইয়াৰ ভিতৰত আছে ধুবুৰী-ফুলবাৰী, পলাশবাৰী-সুৱালকুছি আৰু মাজুলী-যোৰহাট সংযোগী দলং। ইয়াৰ উপৰি পঞ্চৰত্নৰ সমীপতো আন এখন দলং নিৰ্মাণৰ কাম চলি আছে বুলি তেওঁ জানিবলৈ দিয়ে।

মুখ্যমন্ত্ৰীগৰাকীয়ে কয় যে তেওঁৰ পৰৱৰ্তী লক্ষ্য হৈছে মৰিগাঁও-দৰং সংযোগী দলং নিৰ্মাণ। লগতে অতি সোনকালে লাহৰীঘাট সমষ্টিত ৩০ কিলোমিটাৰ দৈৰ্ঘ্যৰ পথ নিৰ্মাণ কৰি দিয়া হ'ব বুলিও ঘোষণা কৰে।

ইয়াৰ উপৰি মৈৰাবাৰী-বুঢ়াগাঁও পথ নিৰ্মাণৰ দাবীৰ প্ৰসংগ উল্লেখ কৰি লাহৰীঘাটত আন এটা পথ নিৰ্মাণৰ কথাও ঘোষণা কৰে মুখ্যমন্ত্ৰীয়ে।

তেওঁ কয়, "ইয়াত আমি কেইবাটাও প্ৰকল্পৰ প্ৰতিশ্ৰুতি দিছোঁ। কিন্তু কাম ইয়াতকৈও অধিক হ'ব। ৰাইজে তেওঁলোকৰ দাবীসমূহ নগাঁৱৰ সাংসদ দেৱাশিস শৰ্মাৰ জৰিয়তে আমাক জনাব পাৰে। আমি পৰ্যায়ক্ৰমে সেই দাবীসমূহ পূৰণৰ ব্যৱস্থা কৰিম।"

লাহৰীঘাট সমষ্টিৰ বাবে পৰিকল্পনা কৰা উন্নয়নমূলক প্ৰকল্পসমূহে ৰাইজৰ মন জয় কৰিবলৈ সক্ষম হ'ব বুলিও আশা প্ৰকাশ কৰে মুখ্যমন্ত্ৰীগৰাকীয়ে।

আনহাতে, নগাঁও উপ-নিৰ্বাচনত কংগ্ৰেছ দলক লৈও সৰৱ হৈ পৰে মুখ্যমন্ত্ৰী হিমন্ত বিশ্ব শৰ্মা। তেওঁ দাবী কৰে যে নিৰ্বাচনত কংগ্ৰেছে তৃতীয় স্থান লাভ কৰিছে আৰু ভোটাৰসকলে দলটোৰ নেতা আছিফ নজৰ আৰু ৰকিবুল হুছেইনক প্ৰত্যাখ্যান কৰিছে।

মুখ্যমন্ত্ৰীগৰাকীয়ে কয়, "কংগ্ৰেছে লাভ কৰা কম সংখ্যক ভোটে প্ৰমাণ কৰে যে ইয়াত ৰাইজে তেওঁলোকৰ নেতাসকলক নিবিচাৰে। অৱশ্যে কংগ্ৰেছে যদি নতুন নেতৃত্ব লৈ আহে, তেন্তে পৰিস্থিতি সলনি হ'ব পাৰে।"

উল্লেখ্য যে লাহৰীঘাট সমষ্টিত বিজেপিয়ে দ্বিতীয় স্থান লাভ কৰিলেও মুখ্যমন্ত্ৰীগৰাকীয়ে নিৰ্বাচনী প্ৰচাৰৰ সময়ত দল জয়ী হ'লে সমষ্টিটো ভ্ৰমণ কৰাৰ প্ৰতিশ্ৰুতি দিছিল। সেই প্ৰতিশ্ৰুতি ৰক্ষা কৰিয়েই তেওঁ সোমবাৰে লাহৰীঘাটৰ সভাত উপস্থিত হয়।

তেওঁ লগতে কয় যে লাহৰীঘাট আৰু চামগুৰি সমষ্টিত বিজেপিয়ে দ্বিতীয় স্থান লাভ কৰিলেও দলটোৱে যথেষ্ট সংখ্যক ভোট লাভ কৰিবলৈ সক্ষম হৈছে। সেয়েহে সমষ্টি দুটাৰ ভোটাৰসকলক ধন্যবাদ জনাবলৈ তেওঁ উপস্থিত হৈছে।
##bigupdate #Newsupdate #assamgovernment #eviction #latestupdate

মন্তব্য (0)

লগইন কৰি মন্তব্য লিখক।

NEWSLETTER

গুৰুত্বপূৰ্ণ সংবাদ আপোনাৰ ইমেইলত

নির্বাচিত শেহতীয়া সংবাদ পোনপটীয়াকৈ লাভ কৰক।