নিউজ ডেস্ক : ভাৰত আৰু শ্ৰীংকাৰ মাজৰ প্ৰথমখন এদিনীয়া ক্ৰিকেট মেচ নতুন দিল্লীৰ অৰুণ জেটলী ষ্টেডিয়ামৰ পৰা স্থানান্তৰ কৰাটো প্ৰায় নিশ্চিত হৈছে । দিল্লী এণ্ড ডিষ্ট্ৰিক্ট ক্ৰিকেট এছ’চিয়েশ্যনে ১৩ ডিচেম্বৰৰ খেলখন দিল্লীৰ পৰা স্থানান্তৰ কৰিবলৈ ভাৰতীয় ক্ৰিকেট নিয়ন্ত্ৰণ ব’ৰ্ডক অনুৰোধ জনাইছে।
সূত্ৰ অনুসৰি, নিৰ্ধাৰিত তাৰিখত মেচখন আয়োজন কৰিবলৈ অপাৰগতা প্ৰকাশ কৰি DDCAয়ে । এই অনুৰোধৰ বাবে এছ’চিয়েশ্যনে বছৰটোৰ এই সময়ছোৱাত দিল্লীৰ প্ৰদূষণৰ মাত্ৰাকে ধৰি একাধিক কাৰণ দৰ্শাইছে। ইয়াৰ উপৰিও ষ্টেডিয়ামখনৰ সংস্কাৰ কাৰ্যও চলি আছে।
সূত্ৰসমূহে প্ৰকাশ কৰিছে যে ৰাজধানীখনৰ বেয়া বায়ুৰ গুণাগুণক লৈ DDCA চিন্তিত, যিটো ইয়াৰ উচ্চ AQI (Air Quality Index) মাত্ৰাৰ বাবে কুখ্যাত। যোৱা ডিচেম্বৰ মাহত ৰাজধানীখনত গড় AQI আছিল ৩৫১, আৰু সোমবাৰে (২ নৱেম্বৰ) অনুৰূপ মাত্ৰা ৰেকৰ্ড কৰা হৈছিল। অতীতৰ অভিজ্ঞতাৰ প্ৰতি লক্ষ্য ৰাখি DDCA-ই কোনো ধৰণৰ বিপদ ল’ব বিচৰা নাই।
২০১৭ চনৰ ডিচেম্বৰ মাহত ভাৰত আৰু শ্ৰীলংকাৰ মাজত অনুষ্ঠিত হোৱা এখন টেষ্ট মেচৰ সময়ত একাংশ শ্ৰীলংকাৰ খেলুৱৈক খেলপথাৰত বমি কৰা দেখা গৈছিল। DDCA-ৰ সূত্ৰই প্ৰকাশ কৰা মতে তেওঁলোকে সেই অপ্ৰীতিকৰ পৰিস্থিতিৰ পুনৰাবৃত্তি নিবিচাৰে। এছ’চিয়েশ্যনে অহা বছৰৰ কোনো এক সময়ত আন এখন খেলৰ বাবে অনুৰোধ জনোৱা বুলি বিশ্বাস কৰা হৈছে।
এই খেলখন তিনিখনীয়া এদিনীয়া শৃংখলাৰ প্ৰথমখন খেল হোৱাৰ কথা আছিল, আনহাতে বাকী দুখন খেল ১৬ ডিচেম্বৰত বেংগালুৰুত আৰু ১৯ ডিচেম্বৰত আহমেদাবাদত অনুষ্ঠিত হোৱাৰ কথা আছিল। এতিয়া BCCI-এ শৃংখলাটোৰ সময়সূচী পুনৰ সালসলনি কৰিব লাগিব।
অৱশ্যে ইয়াৰ পূৰ্বে BCCI-এ খেলখন স্থানান্তৰ কৰাৰ খবৰ খাৰিজ কৰিছিল আৰু সম্পাদক দেৱজিৎ শইকীয়াই খেলখন স্থানান্তৰ কৰাৰ কোনো পৰিকল্পনা স্পষ্টভাৱে অস্বীকাৰ কৰিছিল।
১২ অক্টোবৰত শইকীয়াই কৈছিল, "দিল্লীৰ নিৰ্ধাৰিত ভাৰত-শ্ৰীলংকা এদিনীয়া মেচখন আহমেদাবাদলৈ স্থানান্তৰ কৰা হ’ব পাৰে বুলি ওলোৱা খবৰবোৰ সঠিক নহয়। BCCI-ৰ তৰফৰ পৰা এনে কোনো সিদ্ধান্ত লোৱা হোৱা নাই।
মন্তব্য (0)
লগইন কৰি মন্তব্য লিখক।