নিউজ ডেস্ক : মূল্য বৃদ্ধিক লৈ ফ্ৰান্সত দহ হাজাৰৰো অধিক ট্ৰেড ইউনিয়নৰ সদস্যই ধৰ্মঘট আৰু প্ৰতিবাদ সাব্যস্ত কৰে । দেশখনৰ ৰাষ্ট্ৰপতি ইমানুৱেল মেক্ৰনৰ চৰকাৰৰ ওপৰত এক বৃহৎ চাপ সৃষ্টি কৰি এই প্ৰতিবাদ সাব্যস্ত কৰে হাজাৰ হাজাৰ লোকে ।
প্ৰতিবাদকাৰীৰ দাবী, তেওঁলোকে উচ্চ মজুৰিৰ দাবী উত্থাপন কৰাৰ লগতে ক্ৰমবৰ্ধমান হাইস্কুলীয়া ছাত্ৰ-ছাত্ৰীৰ প্ৰতিবাদী আন্দোলনক সমৰ্থন জনায় । বৰ্ধিত জীৱন ধাৰণৰ ব্যয়ক লৈ এমাহতকৈও অধিক সময় ধৰি চলি থকা ধাৰাবাহিক সমদলৰ পিছত পেৰিছ, লিয়ঁ, মাৰ্চেল আৰু অন্যান্য চৰকাৰী চহৰসমূহত পুনৰ বৃহৎ সমদল উলিওৱা হয়। ইউনিয়নসমূহৰ মতে দেশজুৰি প্ৰায় ২৬০ টা প্ৰতিবাদী কাৰ্যসূচীৰ পৰিকল্পনা কৰা হৈছিল।
ফ্ৰান্সৰ গৃহ মন্ত্ৰণালয়ৰ মতে সমগ্ৰ ফ্ৰান্সত অনুষ্ঠিত ৰেলী আৰু সমদলত ৬ লাখতকৈও অধিক প্ৰতিবাদকাৰীয়ে অংশগ্ৰহণ কৰিছে। মজুৰি আৰু জনসেৱাৰ বাবে অধিক ধন দাবী কৰি পাঁচটা ইউনিয়নে এই কাৰ্যসূচীত অংশ লয়। বাওঁপন্থী চিজিটি (CGT) ইউনিয়নে বৃহস্পতিবাৰৰ এই আন্দোলনত অংশ লোৱা লোকৰ সংখ্যা ১৫.৭ লাখ বুলি দাবী কৰিছে আৰু ২০২৩ চনৰ পিছত ইয়াক এক "অতুলনীয় মাত্ৰা" বুলি অভিহিত কৰিছে। তেওঁলোকে পেৰিছ, মাৰ্চেল, বৰ্ডো আৰু লিলি চহৰত হোৱা বৃহৎ প্ৰতিবাদৰ কথা উল্লেখ কৰে।
পেৰিছত গৃহমন্ত্ৰী লৰেণ্ট নুনিজে পূৰ্বে ৭০,০০০ আৰক্ষী মোতায়েন কৰি সম্ভাৱ্য হিংসাত্মক পৰিস্থিতিৰ বিৰুদ্ধে "অত্যন্ত দৃঢ় প্ৰতিক্ৰিয়া" দেখুওৱাৰ প্ৰতিশ্ৰুতি দিছিল । কেইবাখনো চহৰত কিছু অশান্তিৰ খবৰ পোৱা গৈছে। লিয়ঁ চহৰৰ ৰোন নদীৰ ওপৰত থকা গালিয়েনি দলঙৰ ওচৰত এখন গাড়ীত জুই লগাই দিয়া হয় আৰু উগ্ৰ বাওঁপন্থী "ব্লেক ব্লক"ৰ শ শ কৰ্মী আৰক্ষীৰ সৈতে সংঘৰ্ষত লিপ্ত হয়।
ছাত্ৰ-ছাত্ৰীসকলেও নতুন পদক্ষেপ গ্ৰহণ কৰে, যাৰ ফলত ছাত্ৰ-ছাত্ৰীৰ অৱৰোধ বা শিক্ষকৰ কৰ্মবিৰতিৰ বাবে ফ্ৰান্সৰ প্ৰায় এক তৃতীয়াংশ হাইস্কুল বন্ধ হৈ পৰে বা চলিব নোৱাৰা হয়। ৰাজহুৱা পৰিবহণ সেৱা ব্যাহত হয় আৰু আইফেল টাৱাৰো দিনটোৰ বাবে বন্ধ কৰি দিয়া হয়। উত্তৰ-পূবৰ চহৰ ষ্ট্ৰাছবাৰ্গৰ আৰক্ষীয়ে উত্তেজনাৰ মাজতে একাংশ বিদ্যালয়ৰ ওচৰৰ বাসিন্দাসকলক "অত্যন্ত সতৰ্কতা" অৱলম্বন কৰিবলৈ আহ্বান জনায়।
মন্তব্য (0)
লগইন কৰি মন্তব্য লিখক।