নিউজ ডেস্ক : ৱেলিংটন টেষ্টত ১২৮ ৰানৰ ইনিংছ খেলিলে ঋষভ পণ্টে। আঘাতৰ পৰা সুস্থ হৈ খেলপথাৰলৈ উভতি আহিয়েই টেষ্টত শতৰান অৰ্জন কৰে খেলুৱৈগৰাকীয়ে। পণ্টৰ এই দুৰ্দান্ত ইনিংছৰ সহায়ত ৰানৰ পাহাৰ গঢ়িবলৈ সক্ষম হ’ল ভাৰতীয় দল। এই শতৰানৰ সুবাদত কেইবাটাও নতুন অভিলেখো গঢ়িলে পণ্টে।
‘ছেনা’ দেশ (দক্ষিণ আফ্ৰিকা, ইংলেণ্ড, নিউজিলেণ্ড আৰু অষ্ট্ৰেলিয়া)ৰ মাটিত টেষ্ট শতৰান অৰ্জন কৰা ভাৰতৰ ষষ্ঠগৰাকী ক্ৰিকেটাৰ হিচাপে নতুন অভিলেখ গঢ়িলে ঋষভ পণ্টে। ৱেলিংটন টেষ্টতে এই কৃতিত্ব অৰ্জন কৰিছে কে এল ৰাহুলেও। ইয়াৰ পূৰ্বে ‘ছেনা’ দেশৰ মাটিত টেষ্ট শতৰান অৰ্জন কৰাৰ কৃতিত্ব আছে মহম্মদ আজহাৰউদ্দিন, শচীন তেণ্ডুলকাৰ, ৰাহুল দ্ৰাবিড় আৰু বিৰাট কোহলীৰ।
উল্লেখ্য যে,‘ছেনা’ দেশৰ মাটিত টেষ্ট শতৰান কৰা ভাৰতৰ প্ৰথমগৰাকী স্বীকৃতিপ্ৰাপ্ত উইকেটৰক্ষক-বেটাৰ হিচাপে নতুন অভিলেখ গঢ়িলে ঋষভ পণ্টে। কে এল ৰাহুলেও কেইখনমান টেষ্ট মেচত উইকেটৰক্ষকৰ দায়িত্ব পালন কৰিছে। অৱশ্যে টেষ্ট ক্ৰিকেটত তেওঁ ভাৰতৰ নিয়মীয়া উইকেটৰক্ষক নহয়।
টেষ্ট ক্ৰিকেটত ছয় কোবোৱাৰ ক্ষেত্ৰত নিউজিলেণ্ডৰ প্ৰাক্তন অধিনায়ক ব্ৰেণ্ডন মেককালামক অতিক্ৰম কৰিলে ঋষভ পণ্টে। টেষ্টত মেককালামে ১০৭টা ছয় কোবাইছিল। ৱেলিংটন টেষ্টৰ ইনিংছৰ পাছত পণ্টৰ নামত জমা হ’ল মুঠ ১০৮টা ছয়। নিউজিলেণ্ডৰ বিৰুদ্ধে প্ৰথম ইনিংছত তেওঁ ৬টা ছয় কোবায়। এই তালিকাৰ শীৰ্ষস্থানত আছে ইংলেণ্ডৰ প্ৰাক্তন অধিনায়ক বেন ষ্ট’কছ। টেষ্ট ক্ৰিকেটত তেওঁৰ নামত আছে মুঠ ১৩৮টা ছয়।
শেহতীয়াকৈ উইকেটৰক্ষক-বেটাৰ হিচাপে টেষ্ট ক্ৰিকেটত নৱমটো শতৰান অৰ্জন কৰে ঋষভ পণ্টে। এই কৃতিত্বৰে তেওঁ লেছ এমেছক অতিক্ৰম কৰিলে। এই তালিকাৰ শীৰ্ষস্থানত আছে অষ্ট্ৰেলিয়াৰ প্ৰাক্তন উইকেটৰক্ষক-বেটাৰ এডাম গিলক্ৰিষ্ট। টেষ্ট ক্ৰিকেটত তেওঁৰ নামত আছে ১৭টা শতৰান। দ্বিতীয় স্থানত আছে জিম্বাব’ৱেৰ প্ৰাক্তন অধিনায়ক এণ্ডি ফ্লাৱাৰ। তেওঁৰ নামত আছে ১২টা টেষ্ট শতৰান।
১৫৩টা বলত ১২৮ ৰানৰ ইনিংছটোত পণ্টে ৬টা ছয়ৰ লগতে ১০টা চাৰি কোবায়। অত্যধিক আক্ৰমণাত্মক শ্বট খেলিবলৈ গৈ উইকেট হেৰুৱাৰ বাবে বাৰে বাৰে সমালোচনাৰ সন্মুখীন হৈ আহিছে ঋষভ পণ্ট। কিন্তু আঘাতৰ পৰা সুস্থ হৈ আন্তঃৰাষ্ট্ৰীয় ক্ৰিকেটলৈ উভতি অহা পণ্টক এইবাৰ কিছু সতৰ্ক ৰূপত দেখা গ’ল। বলৰ গতি আৰু দিশ বুজি আক্ৰমণাত্মক শ্বট খেলিছে তেওঁ। অপ্ৰয়োজনীয়ভাৱে ডাঙৰ শ্বট খেলিবলৈ গৈ উইকেট হেৰুওৱা নাই। ৱেলিংটন টেষ্টত এই পৰিৱৰ্তিত শৈলীৰ সুফল লাভ কৰে পণ্টে।

মন্তব্য (0)
লগইন কৰি মন্তব্য লিখক।