নিউজ ডেস্ক : মঙলবাৰৰ মধ্যৱৰ্তীকালীন নিৰ্বাচনত ৰিপাব্লিকান পাৰ্টীৰ বৃহৎ পৰাজয়ৰ পিছত, ডনাল্ড ট্ৰাম্পে কৈছিল যে তেওঁ কংগ্ৰেছত নতুনকৈ ক্ষমতালৈ অহা ডেম'ক্ৰেটসকলৰ সৈতে কাম কৰিবলৈ সাজু। অৱশ্যে তেওঁৰ উপদেষ্টা ষ্টিফেন মিলাৰক সুজি ৱাইলছৰ স্থানত হোৱাইট হাউচৰ চিফ অৱ ষ্টাফ হিচাপে পদোন্নতি দিয়ে।
কংগ্ৰেছৰ প্ৰতি কোনো বন্ধুত্বপূৰ্ণ মনোভাৱ দেখুওৱাৰ পৰিৱৰ্তে, মিলাৰৰ এই পদোন্নতিয়ে হয়তো এইটোকে ইংগিত কৰিছে যে ৰাষ্ট্ৰপতিগৰাকীয়ে হোৱাইট হাউচৰ শীৰ্ষ পদত এজন চৰম দলীয় সমৰ্থকক বহুৱাই এক ৰাজনৈতিক যুঁজৰ বাবে প্ৰস্তুত হৈছে। মিলাৰে এক্স-ত (X) পোষ্ট কৰি লিখিছে, "এতিয়া আমাৰ লক্ষ্য পূৰ্বতকৈও অধিক স্পষ্ট: আমাৰ ৰাষ্ট্ৰপতিগৰাকীক সমৰ্থন কৰিবলৈ আৰু এই বিশাল প্ৰজাতন্ত্ৰক ৰক্ষা কৰিবলৈ আমাৰ সমগ্ৰ আত্মাৰে যুঁজ দিয়া।" ইয়া লগতে তেওঁ এই পদৰ বাবে ট্ৰাম্পৰ পচন্দ হ'বলৈ পাই "ভাষাত প্ৰকাশ কৰিব নোৱাৰাকৈ সন্মানিত" অনুভৱ কৰা বুলিও যোগ দিয়ে।
ৱাশ্বিংটনৰ আটাইতকৈ শক্তিশালী পদসমূহৰ ভিতৰত অন্যতম হৈছে হোৱাইট হাউচৰ চিফ অৱ ষ্টাফ, যি ৰাষ্ট্ৰপতিৰ দ্বাৰৰক্ষক (গেটকিপাৰ), হোৱাইট হাউচৰ কাৰ্যসূচী নিৰ্ধাৰণকাৰী আৰু কংগ্ৰেছ তথা অন্যান্য বাহ্যিক ৰাজনৈতিক পক্ষসমূহৰ সৈতে মুখ্য আলোচনাকাৰী হিচাপে কাম কৰে। নিজৰ 'ট্ৰুথ ছচিয়েল' ৱেবছাইটত এই সিদ্ধান্ত ঘোষণা কৰাৰ পিছত ট্ৰাম্পে সাংবাদিকৰ আগত কয়, "ষ্টিফেন মিলাৰ আৰম্ভণিৰে পৰাই মোৰ সৈতে আছে। তেওঁ কথাটো বুজি পায়।"
ট্ৰাম্প প্ৰশাসনৰ আক্ৰমণাত্মক অনুপ্ৰৱেশ নিয়ন্ত্ৰণ নীতিক নেতৃত্ব দিয়াৰ বাবে মিলাৰ আটাইতকৈ বেছি জনাজাত, যাৰ অধীনত সমগ্ৰ আমেৰিকাত অনুপ্ৰৱেশ বিৰোধী অভিযানৰ বাবে পুঁজিৰ পৰিমাণ বৃদ্ধি কৰা হৈছিল। মিনেয়াপলিছত এক বৃহৎ বিতাড়ন অভিযানৰ সময়ত ফেডাৰেল অনুপ্ৰৱেশ বিষয়াৰ গুলীত নিহত হোৱা এলেক্স প্ৰেটিক "দেশীয় সন্ত্ৰাসবাদী" আৰু " হত্যাকাৰী" বুলি অভিহিত কৰি তেওঁ সংবাদ শিৰোনাম দখল কৰিছিল। অৱশ্যে পিছলৈ তেওঁ নিজৰ মন্তব্য প্ৰত্যাহাৰ কৰি কয় যে ফেডাৰেল এজেণ্টসকলে হয়তো সঠিক নিয়ম অনুসৰণ কৰা নাছিল।
বাতৰি অনুসৰি ভেনিজুৱেলাত চলোৱা আমেৰিকান সামৰিক অভিযান আৰু কেৰিবিয়ান তথা পূব প্ৰশান্ত মহাসাগৰত সন্দেহযুক্ত ড্ৰাগছ সৰবৰাহৰ বিৰুদ্ধে লোৱা পদক্ষেপসমূহৰ ক্ষেত্ৰতো তেওঁ এক মুখ্য ভূমিকা পালন কৰিছিল, যাক সমালোচকসকলে আইনী প্ৰক্ৰিয়াৰ বহিৰ্ভূত হত্যাকাণ্ড বুলি গৰিহণা দিছে।
মিলাৰে ২০১৬ চনৰ ৰাষ্ট্ৰপতি নিৰ্বাচনৰ প্ৰচাৰৰ প্ৰাৰম্ভিক পৰ্যায়তে এজন ৰণকৌশলবিদ আৰু ট্ৰাম্পৰ উত্তপ্ত নিৰ্বাচনী প্ৰচাৰ সভাসমূহৰ এগৰাকী উত্তেজক বক্তা হিচাপে ট্ৰাম্পৰ ৰাজনৈতিক দলত যোগ দিছিল। ট্ৰাম্পৰ প্ৰথমটো কাৰ্যকালৰ সম্পূৰ্ণ সময়ছোৱাত টিকি থকা কেইগৰাকীমান জ্যেষ্ঠ হোৱাইট হাউচ বিষয়াৰ ভিতৰত তেওঁ অন্যতম আছিল। ২০২০ চনৰ নিৰ্বাচনত পৰাজয় ওফৰাই পেলাবলৈ কৰা প্ৰচেষ্টা ব্যৰ্থ হোৱাৰ পিছত সৃষ্টি হোৱা ট্ৰাম্পৰ ৰাজনৈতিক নিৰ্বাসনৰ সময়তো তেওঁ ট্ৰাম্পৰ প্ৰতি আনুগত্য বজাই ৰাখিছিল। ইয়াৰ পিছত তেওঁ ট্ৰাম্পৰ দ্বিতীয়টো কাৰ্যকালত নীতি বিষয়ক ডেপুটী চিফ অৱ ষ্টাফৰ প্ৰভাৱশালী পদত প্ৰত্যাৱৰ্তন কৰে।
মন্তব্য (0)
লগইন কৰি মন্তব্য লিখক।